Öcalan mhathathle i qroytayde leşan du troyo du zayno  

IMRALI, Turkiya — U rişono di PKK Abdullah Öcalan meqım mu maşıqlo du troyo du zayno di PKK dıkmıntır dımşare 11 bu yarho d’Tamuz frısle egartho b’Vidyo. Öcalan dkıtyo bu hbuşyo d’İmralı mi şato dan 1999, hani 26 ışne i naqla qamayto fris ele hezwono videyo. Öcalan bi egarthayde du vidyo dı friso bu ajans da tebe d’Fırat mırle ”kımdawamno dımdafacno i qroyto du şlomo udu kenşo demoqratikoyo dsimo 27 Şbot.”

Öcalan mawdacleste, i duktho dımte liya bu maşıqlano ğalabe olsoyto u makthabzabnoytoyo, u mırle ”u zawco di PKK dıkmısnadwo lu tenkiro di ithutho u dkıtwole nişo dawle frışto, tayım. I ithutho i mawcudiye maqbılo, bu şıkılano u nişo asasi hawi. Hano kothe li mıcne u zabnayda xalıs.”

Abdullah Öcalan kali cali olsoyutho, du maşıqlo du troyo du zayno klozım dhowe cal asas d’mabco mu lebo, udu Parlamento d’Turkiya’ste maşe u fulhono b’komisyon rwiho dmişatıs b’qonuno. Öcalan dıgrışle u zuhoro calu ağuno du zayno d’50 ışne, mawdacle du maşıqlano hthim, mdarbe mşarele ağuno hatho du Manifesto du Kenşo Demoqratikoyo. U mşalatle bahro cali sbutho, di PKK trela mu nişayda di dawle di umtho.

Bi egarthathe du Vidyo d’Abdullah Öcalan dı grişo 19 bu yarho dı Hzirın udı friso adyawma safrayto cali sbutho di hiruthaye dıkmitahto xıd şart qadmoyo mırle ”kıdcitu ıno lo naqla lıhzeli i hiruthaydi xıd şwolo farsufoyo. I hirutho farsufoyto lıkhozela şritho bi hirutho kenşoyto.”

I egarhathe d’Abdullah Öcalan kıtla iddica leşan Turkiya, lu Madınho Mıscoyo u rwıhtır mawxaste dımqadım hzayto d’Demoqratoyutho dkıtyo Modern.