31/08/2020

Ocdo hawi mwatyutho beyn Turkiya u Fransa

İ mwatyutho dımşarewola bayn lu Yawnan u l’Turkiya ucdo hawyo mwatyutho bayn Fransa u l’Turkiya bi sbutho du kroxo dcalu nafto bu yamo mıscoyo.

Bi sbuthathe u rişqutno Emanuel Macron i wazirto du sutoro Florence Parli sımlın sturyo calu qedomo d’Turkiya u d’Erdoğan bi sbutho du qetro du kroxo du nafto.

Hani zabno yarixoyo u rişqutno d’Fransa ksoyım maqırhonwotho mqabıl da klayotho u da rmoşe dıksaymo Turkiya bu yamo mıscoyo, be bzabno a rişone u mşale du athro du Yawnanste kmahwın hfuxye mqabıl d’Turkiya u kmahwın dı latla zedqo dsaymo kroxo calu nafto u cala gazat bu yamo mıscoyo elo Turkiya kımdawmo dı tıryo isfitheyda du kroxo bu yamo mıscoyo.

Bi sbuthathe u rişqutno d’Fransa Emanuel Macron sımle maqırhonutho dkomır Turkiya hani zabno lo lfuth i tahrazto du NATO dkıtyo hadımto eba kmalxo elo lfuth a manfacat dkıtla lruha kmalxo u hano latyo mede dkibe mitaqbıl.

Macron mahkele naqqa hreto la gıyunore d’Fransa mahıtla xtute semoqe ba fulhone du yamo mıscoyo dlo kowe dı Turkiya faytolın hano mede dkımcaqbinaleyo me qariwo.

Me gabo hreno u wazırto du sutoro du athro d’Fransa Florence Parly bi maqırhonutho dhula lu tboco froso sımla Turkiya sturyo u mırla Turkiya kıtla zedqo dhuyo bu yamo mıscoyo elo layto fsoso u zedqo dsaymo kroxo calu nafto mawxa Turkiya u mede dıksaymo tahrik du qroboyo.

Lfuth hın mu tbcoco froso d’Turkiya u Yawnan u Turkiya matın l’darğo du qrobo bi sbuthathe du yamo mıscoyo lfuth a tebani kmitawmır du Yawnan u Fransa kmodın qyomo du sutoro bayn dıhdode, bebzabno kmitawmır du athro du Yawnan knoqıl folhe lhın ma gozaryotho dkıtne qariwe la dukotho d’Turkiya dıg kurxi calu nafto.

Me gabo hreno a mşale d’Turkiya u rişqutno wu waziro di baroyutho  mahwelkın hfuxyo ba maqırhonwotho dıksaymi elo u mede dıkmahwe Fransa u athrawotho d’Urifi makadne bi sbuthathe dımdawmi mqabıl d’Turkiya.