Pakistan mraşahla Trump lu şukono du Nobel

ISLAMABAD – Bi egartho dfrısla athmıl i şultonutho d’İslamabad bi dfayda d’X, m’akadla dımraşahla u rişono Amerikoyo lu şukono du şlomo d’Nobel di şato da 2026. Bi egarthathe Pakistan kımawdıco, di mudaxala diplomatiqoyo ubi rişonutho ulsoyto dmahwele u rişono Amerikoyo Donald Trump bu kriz haroyo dhawiwo beyn du Hınd d’Pakistan, kışowe lu şukonano du şlomo d’Nobel di şato dothe.

Bi sbuthathe’ste u rişwazire du Hınd Narendra Modi rfıdle i hzayto d’Pakistan cali mescoyutho dsımle Trump u mırle; İ hzayto dhiwo calu dawro dmıştacela Amerika bu kriz dnafıqwo bu falqo d’Kashmir du Hınd, latyo şroro. Bu zabno du krizano kule dımdawamwole ba yawme-lawi ulo ha droşo, camu rişono d’Amerika.

İ aykanoyutho da 2 athrawothani dkıtne more d’zayne nukleer qaşyo’wa meqım yarho bıthır mıd ğrob msalho qtiwole 26 farsufe bu falqo d’Kaşmir du Hınd. U ğrobano mhewole ba turist wu Hınd’ste baroyo mfanewole u mhewole b’dukotho frişe d’Kaşmir d’Pakistan. Bi harayto du yarho dşafıcina, sımwo bi harayto qyomo di şalyuthzayno beyn da 2 athrawotho u lfuth Pakistan, i şalyuthzaynathe athyo lu hwoyo bu snodo d’Trump.

Elo Trump mdacewole, bıthır 4 yawme d’taxtuşe beyn du Hınd u Pakistan bu yarho d’İyor, hawiwole droşo yarixo acmaye u maklanwo a mhoye. Bebzabno Trump lıkmıtyaqın dgımidaşın u şukonano ubi dafayde mawdacle dkıtyo qanico bi sbuthathe. Trump mırle; Ono mın dsaymono’ste, lıgmitahweli u şukono d’Nobel. Ono kışowe’no lo lbelhude ha şukono, elo l’5 şukone d’Nobel.