Papa Leo XIV sımle qroyto la hayle tibeloye rabe dıbritho dmaklın a’qrobe, u mahwele i hzinutho rabtho dkıtle mu qrobo d’Ğaza
VATIKAN – Qum d’kunoşo rabo dlayım bi mditho d’Roma, u papa hatho du Vatikan Mor Liyon da na’14 bu mamlo dsımle athmıl safrayto, sımle qroyto dmıflıh hul dmımte l’şroyo şariro, kino u aminoyo b’Ukraina, ubebzabno sımle qroyto dmitarfın a’hbişoye kulle, udmitadcıri a’nacime la yaqrothaththe.
U papa du Vatikan sımle ste qroyto dmitakle u qrobo b’Ğaza, udmiqadmi a’mcadrınwotho noşoye la comure mdinoye tacobe, udmitarfın a’barmothoye İsarloye kulle dmidi yasire mu zawco d’Hamas.
Camgabıdathe, Mor Liyon da na’14 dımnaqe papa hatho lu Vatikan 8 bu yarhano, m’ayadle u qyomo du tekliyo da taxtuşe bayn du Hınd u Pakistan dfayıt la haye bumıhreno blalyo, u mırle “ktolabno m’Aloho d’obe lıbritho i tadmırto du şlomo”.
Papa Liyon bu mamlo dsımle bi mıştawtfonutho d’casrowat alfawo d’camo dlayimi athmıl bu qurobo alohoyo qadmoyo dsımle bu Vatikan mu zabno dımnaqe rişono hatho li cito Qatholiqoyto, mşaçacle a’rişone rabe dıbritho dmaklın a’qrobe, u mırle “lo la qrobe naqla hreto”, u mkararle i qroyto dsımwole ğalabe naqlat i tlithoytube mnohanfşo papa Mor Fransis lu şlomo. Ubebzabno grışle u zuhoro calu duxrono da 80 ışne du qrobo trayono dıbritho dıqtılwo ebe hedor d’60 malyune dıbnaynoşo.
Papa Mor Liyon da na’14 grışle ste u zuhoro cal britho dıkfayto adyawma m’tahrazto mahişonitho du qrobo tlithoyo dıbritho dıkşıfco bı maşqıle mşahılfe.