Papa Mor Fransis Qadmoyo gıdloqe a rişone folitiqoye Mşihoye d’Lebnon

İ qadişutho du papa du Vatikan Mor Fransis Qadmoyo gıdloqe a’rişone folitiqoye Mşihoye d’Lebnon.

Bi lqoytathe dıkmıntır dhuyo bu şuroyo du yarho dı Tamız dıbqamuthayna, gıdmıdroşo i aykanoyutho mahişonitho d’Lebnon dmati l’qum du shofo.

İ dafo d’Vatikan News, mawdacla di qadişutho du papa Mor Fransis Qadmoyo gıdqore a’rişone folitiqoye Mşihoye d’Lebnon laşan dloqın i qadişuthayde ha bu yarho dı Tamız dıbqamuthayna bu Vatikan, bnişo dmıdroşo b’cumqo i aykanoyutho lo tawto d’Lebnon, udmitaqım slutho mşawtafto camıhdode laşan dmitarku u şlomo wi şalyutho bu athrano dmati l’qum du shofo.

Mor Fransis bi maqırhonutho dhule mırle “m’ucdo ktolabno menayxu dmaqmitu slutho di awyutho xıd hıdriye li qoyto dgıdhuyo cama rişone folitiqoye asasi da Mşihoye d’Lebnon, uktılbina dactid dkibe zıd şlomo lu athrano u habibo”.

Lfuth i cito Suryoyto Marunoyto, i lqoytathe dgıdhuyo ha bu yarho dı Tamız dıbqamuthayna, kmıntır dıtıryo tathir msimono cali aykanoyutho folitiqoyto d’Lebnon, u gdımşadro ste egartho du sukolayda “Lebnon latyo balhude bu krizayde ducdo”.

Meqım mathe, u papa Mor Fransis bi egartho dımşadrowole bu yarho dşaficina lu rişqutno Mişel Caun, makadwole d’Lebnon laybe dımvayıc lo i hiyoyuthayde uloste u nesyuno di ciyeşe mşawtafto bayn da n’ahunone dıtrela dhowe egartho lıbritho kula.

Lebnon kşofıc ucdo m’kriz dıkmıhşu u kriz momunoyo u folitiqoyo qaşyo dkulle mu zabno du qrobo gawoyo di şato da na’1975 udımdawamwole li şato da na’1990. Mi celtho du krizano, falgıd da bnaynoşo d’Lebnon khoyın ucdo laltah du xturo di faqirutho, umu zabno du furqoco du lmino d’Bayrut i şato dşaficina lımte hul ucdo l’awyutho cali sbutho du şekolo di şultonutho hathto.