Pelosi mawdacla Amerika athro demoqratoyoyo latyo xıd Turkiya

İ rişonitho du mawtbo tahtoyo di kongre d’Amerika Nansy Pelosi, mawdacla d’Amerika athro demoqratoyoyo u latyo athro xıd Turkiya, dlıktore i şultonutho dşufco b’şıkıl mşayno la gabe hrene saqıbloye.

 Camgabıdathe, Amerika mzaharla Ankara dgıdgurşo a şırkat du hulmono dkıtla bgawe d’Turkiya, en dlobo a dayne dkito acla.

 İ rişonitho du mawtbo tahtoyo di kongre d’Amerika Nancy Pelosi, sımla sturyo qaşyo u rejim diktatör d’Turkiya, cal dıkmıstacmıl u haylo leşan dımdawım dfoyış bi şultonutho. Pelosi dkıtyo mu gabo demoqratoyo d’Amerika bu funoyo dhula la gelyunore calu şuwolo en u rişono Donald Trump dothe dılo qomır a guboye hal gıdmaslım i şultonutho b’şıkıl mşayno aw lo, Pelosi hawxa mırla; Ahna latna b’Turkiya, harke demoqratoyuthoyo.

Pelosi, grışla u zuhoro cali yasifutho dıkmahwe Trump la rişone dıkmıski i şultonutho l’zabne yarixe, u mathkarla d’Trump kmoyıd xıd mathlo l’ruhe u rişono ’Rusya Vlademir Putin, u rişono d’Qore i Garbyayto Kim Jong Un wu rişqutno d’Turkiya Recep Tayip Erdoğan. Pelosi mırlaste; U rişonaydi Trump kıbcono dmamtiyono l’bolox, d’hat latat b’Qore i Garbyayto aw b’Turkiya u loste b’Rusya. Hathe Amerikayo, u harke demoqratoyuthoyo.

Me gabo hreno, u rişizgado d’Amerika b’Turkiya David Satterfield, mawdacle da şırkat Amerikoye gıdmarhıqi ruhaye mi şuqo Turkoyto, en dılo makışro Ankara bu tehwiyo da dayne dkıtte acla la şırkat Amerikoye kulle du hulmono.

Satterfield bi maqırhonuthayde mırle; Erdoğan wu hathnayde huwolın wacdo meqım şato lu waziro di xazine u du momuno d’Turkiya Berat Albayrak dobın baroyo a dayne dkito cali waziruthayde, elo Ankara hul ocdo lo hula a daynayda la şırkat Amerikoye da samone u dıkmotın l’hedor 2 milyare u 300 mılyune dolare. Wu medano latyo lu yuthrono d’Turkiya.

U bi sbutho da qayde dıkmahtolın Turkiya cala dafe kenşoye du nawlo, u rişizgado Satterfield bu mamlo dsımle bu lumodo di tagorutho dımtayıb bu nawlo mırle; Aşırkat Amerikoye du tboco froso kibe bi harayto, dtorın mi şuqo Turkoyto, dilonoyith bıthır mıd AKP bi rişonutho d’Erdoğan, mafıtla la haye qonuno dıktore a dafe kenşoye du nawlo dhowın nişo zıttır lu duyoqo.