Kılıçdaroğlu mahwele hfuxyo calu msoko d’Selahatin Demirtaş

U gabo saqıbloyo d’Turkiya CHP, mawdacle du amro du msoko du rişono zawgoyo dmeqım d’HDP Selahatin Demirtaş, kmıhşıw laşane xıd nişo du neshono.

 Mxasra hreto, a pwelıs d’Turkiya msıklın hol 82 hadome d’HDP, beynothaye rişone d’karxıwotho, cal dmıştawtafwolın la tagılyotho dsimi bi şato da 2014.

 U bethdino d’Turkiya fsıqle dmitawrıx u hbuşyo da 2 rişone zawgoye dmeqım du gabo Demoqratoyo da Came-HDP Selahattin Demirtaş u Fidan Yuksekdağ, u bu şıkılano gıdmdawmi dfayşi bu hbuşyo dkıtne ebe hani arbac eşne. Calu fusqonano, u rişono du gabo Qutnuthoyo da Came Kemal Kılıçdaroğlu, bi maqırhonutho dhule lu froshezwo mırle; A fusqone du bethdino kulle dıkmimodi bhaq dide, kmıhşowi nişo du neshono/du şaraf leşan Demirtaş.

Kılıçdaroğlu bu fuşoqo dhule calu hjomo dsımle Demirtaş calu mqimdino gawonoyo d’Turkiya, mırle; Mede kyonoyoyo dmisomi a mqimdine sturye. A mqimdine en dmıdlın fusqone yaste en dılo maydilın lfuth u talab dhın, u medano kothe li mıcne dlayto kinutho bgawe d’Turkiya.

Camgabıdathe, u mqimdino gawonoyo d’Ankara mıdle fusqono du msoko d’82 hadome d’HDP me 7 qlime mşahılfe, cal dmıştawtafwolın la tagılyotho dsimiwo beyn 5 uhul 9 bu yarho d’Teşrin u qamoyo da 2014. Beyn da msikoyani kitoste u rişono zawgoyo di karxutho d’Qarıs, u mathlono d’HDP bi sictho celayto dıkmcaqbo u tboco froso, u hadomo di sictho dan esore baroye d’HDP wu qoyumo catiqo Sırı Sureyya Önder u ğer.

Ba 2014 ba tagılyotho du protesto dımtaybiwo b’Turkiya, mahwewo awyutho cama Kurdoye d’Suriya bıthır mu kboşo dsımwole u tukoso marıhbono d’Dacış cal Kobani. Bu cnufyo dhawiwo ba tagılyothani qtılwo 37 farsufe b’Turkiya.

Me gabo hreno, Fiyaz Ö dkıtyo ma falohe du şutoso dan istixbarat d’Turkiya u MİT, bi maqırhonutho dhule li şultonutho d’Austuria, mıctarafle dmıdwole amro bu yarho d’Ob dşaficina du qatlo di folitiqoyto Kurdoyto Perivan Aslan dkıtyo hadımto bu gabo da Yaroqe d’Austuria. U hadomo du MİT Fiyaz Ö dkıtle ğensoyutho İtaloyto, huwle xabro li şultonutho d’Austuria dhani zabno ksamwo duyoqo i folitiqoyto Aslan, u mawxaste msıkwole qelayto b’hotel leşan dımcaqabwo u mazlo mathyayda.