Pompeo sımle socurutho lu athro d’İsroyel

Amerika thımla u İran dıkmıstacmıl a’timoyotho du athro, bnişo dforıs i zuctho bı britho.

M’gabo hreno, İsroyel mwasafla u hboso dkımdawmo Amerika dıksaymole mqabıl du İran.

U waziro di baroyutho d’Amerika Mayk Pompeo sımle adyawma socurutho lu athro d’İsroyel, ulaqi bi mditho d’Urışlem u rişwazire Bınyamen Netenyaho.

Pompeo bi maqırhonutho dhule lu tboco froso meqım mi ytawto dhawile cam Netenyaho, thımle u İran dıkmıstacmıl a’timoyotho du athro, bnişo dforıs i zuctho bı britho dıkcayşo ucdo kriz qaşyo du hulmono udu momuno.

Pompeo mırle “an’İranoye kmıstacımli a’timoyotho du rejim d’Ayatullah laşan dımbarbız udforıs u zuctho ba n’athrawotho dıbritho. U İran kımdawım u qedomano cıl mdu camayde kmahwe mrodo mqabıl du kewo du virus d’Corona, ubu zabno dkıtyo britho kula şğuşto bu krizano du hulmono. U medano kmagle cali hiyoyutho da farsufe dkımdabri u athrano”.

Megabo hreno, Netenyaho bu mamlo dsımle bıthır mi ytawto dhawile cam Pompeo, mwasafle u hboso dkımdawmo Amerika dsaymole calu İran, bu zabno dkımdawmi a’tahrazyothayde di bceldboboyutho mqabıl d’Amerika, d’İsroyel udu qlimo du madınho mescoyo. Netenyaho mırle ste “i socurutho d’Pompeo ksıhdo lu haylo qawyo du koalisyonaydan”.

Camgabıdathe, Pompeo bu mamlo dsımle mawdacle dıdrışle cam rişwazire d’İsroyel, u kriz d’Corona, u tehdid du İran wi tahrazto du myodo d’falqe d’arcotho mi fnitho di Diffa Macırboyto udmitasri cami şultonutho d’İsroyel.

Pompeo bi maqıblonutho dsımla acme i sdreyawmo İsarloyto d’Hyum mırle “kıtlan sabro dqıdrina dmaqıncina i şultonutho dı Fleşt, dıklozım dmabdın u diyalog cama İsarloye bu taro di hzayto du şlomo dmawdıcowole u rişono d’Amerika Donald Trump”.

M’zabno dı tre yarhe, hathe i socurutho qadmoytoyo dıksamla Pompeo lu athro d’İsroyel, mi celtho du virus d’Covid- 19.