Putin mbayanle mathlono dilonoyo l’Suriya

Mbayın mathlono dilonoyo lu rişqutno d’Rusya Vilademir Putin bu athro d’Suriya.

 U medano dıxlıqle şğuşyo bayn da bnaymothoye d’Suriya, kmıhze xıd kboşo Rusoyo baroyo lu fusqono siyasi du rejim d’Suriya.

 U rişqutno d’Rusya Vilademir Putin bu fusqono dmıdle lumıhreno, mbayanle u rişızgado d’Mosko b’Darmsuq Alexander Yefimov mathlono dilonoyo laşane b’Suriya.

Lfuth itahwitho dıfrısla i rişızgadutho Rusoyto b’Darımsuq, Yefimov mbayın mathlono dilonoyo d’Putin, bnişo dmişawşıti anesore d’Rusya camu athro d’Suriya.

U fusqonano d’Putin xlıqle şğuşyo rabo bayn du camo d’Suriya, ube bzabno trele dhowe otho d’şuwolo calu fusqono ida dkıtyo u sukolayde terwiho di morutho dkıtla Rusya calu athro d’Suriya awste kmıhşu tedbir kyonoyo dkıtle asirutho cami siyase baroyto dkımaşyola Rusya.

Lfuth i hzayto dhın gabe u farsufe folitiqoye, u fusqono d’Putin kmıhşu xıd kboşo Rusoyo baroyo lu athro d’Suriya, ukmahwe ste mıqqa kıtla Rusya tathir calu dactid d’Suriya.

Alexander Yefimov dcımre 62 ışne, mbayanwo rişızgado d’Rusya bı Darımsuq i şato da 2018, u meqım mathe i şato da 2013 mbayanwo rişızgado d’Rusya bu athro da İmarat Caraboye Mhayde. Bebzabno Yefimov flıhwole bi rişızgadutho Rusoyto dkıtyo bi erişkoyto d’Yurdnon Camman, u flıhwole ste bu haqlo da sebwotho du madınho mescoyo udu garbiyo d’Afriqya bi wazirutho di baroyutho d’Rusya.