Putin tlıble mu Macırbo d’obın şudoyo b’kthawto dmitakle u rwoho du Nato bi xasra du madınho, udmitaqım falqo rabo ma tedbire dmahti cal Mosko

MOSKO – Mabuco Rusoyo b’darğo celoyo bi maqırhonutho dhule l’Reuters, mawdacle du rişqutno Valdimer Putin hadiroyo lu şlomo, elo mqabıl d’şartat u tamal mbayno. 

Reuters mawdacla d’Putin kobıc ma hayle rabe du Macırbo şudoyo b’kthawto, dmaklın u terwiho du Nato bi xasra du madınho d’Urifi, awkith dlımitıftakır mucdo wazolo d’athrawotho xıd Ukraina, Gorgia, Moldova u athrawotho hrene dkıtwın hadome bu Huyodo da Soviet dmıştawtıfi lu Nato. 

Bebzabno, Putin ktolıb dfayşo Ukraina athro noytral, dmitaqım hın ma tedbire dmahtile u Macırbo cal Rusya, dmışroyo i sbutho da zuze Rusoye dkıtne majımde bu Macırbo, udmisım u garanti da zedqe da farsufe dkımmallıli bu leşono Rusoyo b’gawıd d’Ukraina. 

Mxasra hreto, u rişqutno d’Ukraina Volodomir Zelenski sımle qroyto dmitayıb knuşyo tlithoyo bayne ubayn da tre rişone d’Amerika Donald Trump ud’Rusya Vladimer Putin, bu taro da fulhone dıksamlın Zelenski bnişo dmakılyo Mosko a’hçomayda cal Ukraina. Elo u Kremlen athmıl b’surhobo hule funoyo li qroytathe, u mawdacle dlayto mkono dmitayıb hawxa knuşyo in dlımımte mı meqım l’qyome qawye. 

Bebzabno, Zelenski tlıble mu Nato dımşadır zminutho l’Kiyev laşan dmıştawtfo ba ytawyotho dgıdhowın 24 u 25 bu yarho d’Hzirın dıbqamuthayna, u mawdacle in dothe u Nato dlımşadır zminutho l’Ukraina, gıddobe inaqlayo zoxutho lu rişqutno d’Rusya.