QASAD krıhlın a’hçome dıkmisomi cala qıryawotho ucala qastrat dkıtne bi hiğmonutho d’Suweda

SURIYA — Bu hfuxyo dmahwelın cali mwatyutho di mşaynutho dkito bi hiğmonutho d’Suweda bu taymno d’Suriya, a’haylawotho d’Suriya demoqratoyto d’QASAD bu buyono dıfrıslın mırlın “kıkırhina u dewam da hçome uda dyoşe dkowın cala qıryawotho ucala qastrat di hiğmonutho d’Suweda”. 

QASAD bu buyonaththe mawdaclın bi netiçe da taxtuşe dhawın b’Suweda, ğalabe ma n’abne di hiğmonutho mvayaclın a’hayaththe, ubebzabno mawqıd u manhıb ba casrowat d’bote u mazracyotho da mdinoye. 

Camgabıdathe, QASAD mawdaclın du dewam da hçome calu camo d’Suweda wu tecjizayde ba haye yawmonayde, bu mazlo mathyayde ubu sebyonayde, kımmathli mabuco dilothnihutho u fsoqsabrone la nişe dkıtlın a’Suriye. 

Bu huthomo du buyonaththe, a’haylawotho d’Suriya demoqratoyto sımlın qroyto dmitaklın a’hçome cal Suweda, udmisım u garanti dlowın tekrar, udmitahwe aftho kamılto la insiyative athronoye dmaydi duktho bu şroyo da krize ub’şıkıl dıkşowe la nişe dkıtlın a’came kulle du kenşo d’Suriya. 

Camgabıdathe, i mdabronutho yothoyto demoqratoyto du qlimo du garbiyo u madınho d’Suriya bu buyono dıfrısla adyawma, krıhla a’hçome dıkmisomi cali hiğmonutho d’Suweda udıkmaydi nişo elaye camo şerşoyo mdu athro. U buyono mathkarle ste da hçomani kmisomi bnişo dmitaciqo i halıqto di şalyutho bu darbo di marıhbonutho udu tezico da mdinoye ubu xloqo di fıtne udu şğuşyo. 

Bebzabno, u mawtbo d’Suriya demoqratoyto d’MSD bu buyono dıfrısle adyawma, krıhle u qedomo di şultonutho d’Suriya dhawyo taraf ba taxtuşe dhawın bi hiğmonutho d’Suweda, u mawdacla du tfoko du maşıqlo lafu darbo folhoyo lıkımşabıl a’sebwotho da Suriye.