13/06/2021

QASAD rfıdle athome dıfrisi aclaye dkıtte sawco ba hçome dsim cali mditho d’Afrin

A Haylawotho d’Suriya Demoqratoyto, rfıdlın a thome dıfrisi u dımdace dkıtte sawco ba hçome dsimi cali mdito d’Afrin. Camathe’ste i Mşatasto da zedqe noşoye d’Suriya m’akadla, ba hçome dsımle u rejim cal Afrin, qtil hol 20 mdinoye.

Me gabo hreno, a comure d’Afrin mahwelın hfuxyo qaşyo mqabıl da hawbe dıkmaşın a hayle kaboşe d’Turkiya calu kanton.

Bi maqırhonutho dfriso mu qentrun du tbocofroso da Haylawotho d’Suriya Demoqratoyto rfıdlın a tebe dfrisi u dımdace, da Mharbonathe kıtte asirutho ba hçome dsimi athmıl casriye calu qentrun di mdito d’Afrin. A cuqobe dsimi athmıl, mtaybi me hayle lo idice u bıthır baroyo, thimi a hayle d’QASAD ba hçomani dcal Afrin.

Calathe bi maqırhonutho dhuwle u mşalo du tbocofroso d’QASAD  rfıdle baroyo a tebani u mırle; Ahna kım’akdina , dlatlan ayya sawco ba hçomani, cal dlatlan Mharbone ba dukothani u kısaymi qroyto la dafe du nawlo, dlo fırsi tebe dlatne şroro mqabıl da haylaydan. Bhaq da hçomani dsim cal Afrin, i Mşatasto da zedqe noşoye d’Suriya frısla i netiçe da cuqobe dsimi.

Lfuth i Mşatasto, ba soruhe dmafiri athmıl-nafili cali bethkrihe d’al Şifaa d’Afrin dkıtyo bi morutho da ğrobe noqufe d’Turkiya. Gawonoyith ba hçomani dsimi, qtil 18 farsufe; beynothaye mşalo folhoyo da marhıbonani. Camani’ste mçarıh 23 farsufe ba soruhe dmafiri mu garbyo d’Holob. İ dukthathe’ste da Şica dıkmısnodi mu İran umu rejim d’Suriya’yo wu qariwe’ne la dukotho da hayle di YPG.

Cala hçome ucalu cnufyano dıkmdawım cala comure d’Afrin-dilonoyith ma hayle Turkoye uma marhıbonathe, ba mowat dıbnaynoşo du kanton mıştawtaflın li taglitho dsimo bnişo dmahwın u hfuxyathe cala hawbe yawmonoye ucalu qtolcamo dıkmaşyo d’Turkiya b’Afrin ubu garbyo du Cıraq. Ba mamle dsimi bi taglithathe, mawdıc’ste; bi ahonutho dkito beyn da came, gıdquşcina u kboşano d’Turkiya uda marhıbonayda.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…