09/05/2021

Qaşişo George Çaçan mşanele bu athro du Swed

U musiqoro wu kohno di cito Suryoyto Orthodoksoyto Abuna qaşişo Corc Jajan mşanele ma hayani adyawma yawme d’Huşabo bu zabno dkıtwe bi teşmeşto di cito Mor Gewargis d’Norsborg du Swed.

U mnohnafşo inaqla qamayto u camo Suryoyo adıcle xıd ha ma musiqore qamoye di zmarto Suryoyto bi mdito d’Qamşli, u bıthır hawi kohno di cito.

U musiqoro u kohno di cito Suryoyto Orthoduksoyto mawladwo ban 1946 bi mdito d’Qamişli  me Abohe Hanna u Şahre Çaçan elo bu şerşeyde mi qritho d’Arbo d’Turabdin’yo. Bıthır mıd mkamewole i madraşto trayonitho, mşarewole bi madraşto di musiqi b’Darmsuq u bıthır mıdwole i sohdutho di bethsawbo bu ferco di musiqi.

Bıthır mıd mıdwole i sohdutheyde, hawiwo malfono di musiqi la madraşyotho di Qamişli u mdawamle bi malfonutho hol dımgalwele lu athro du Swed u hawi kohno li cito d’Mor Gewargis d’Norşborg hulu şunoyeyde-adyawma bıthır mu Qurobo Alohoyo dsımle bi cito d’xdımle bi kohnutho.

U mnoho d’Abuna Qaşişo George Çaçan kmihşu ha ma mşatsone qamoye di zmirto Suryoyto camoyto bu leczo Suryoyo camoyo. Huwe’yo ha ma qamoye dımnahele a zmaryotho qamoye camnoye ubu darbano sımle fulhone rabe d’xdımlın i zimarto Suryoyto. U mhasyo mıştawtafwole cama omure u sayome da zmaryotho qamoyo xıdu mnohnafşo Danho Daho wu omuro George Şamcun dıkmdawım bu syomo da zmaryotho.

Bebzabno mahwewole fulhone cama musiqore qamoye xıd mnoho Gabriyel Ascad u Pol Mixayel bu syomo da zmaryotho Suryoyotho. U mnohnafşo qaşişo George Çaçan hawile tacbo rabo bu terkiwo di zmarto Suryoyto dfriso beyn du cameydan.  Mawxa u şunoyo d’Abuna qaşişo George Çaçan hawi xsara rabtho li zmarto Suryoyto uli cito Suryoyto Orthuduksoyto.

U mnohnafşo bıthır mıd hawiwo kohno maşmacwole u ışmeyde bi makixutho dkıtwole mqabıl da hadome di citayde udu camo Suryoyo, hawi u kohno du lebo nadifo dmahwewo bi teşmeşto di kohnutho dsımle li cito Suryoyto. Adyawma bıthır mu Qurobo Alohoyo dsımle yatıw cami sictho u ştele koso d’qhutho u bıthır bu mazleyde dli cito leşan cmodo-bu cboreyde dli cito kmazlım a hayayde lu moreyde.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…