Qoyumo Çelik bi rmoyto dımqadmole grışle u zuhoro cala akore dkıtne b’Turcabdin dıklozım micawni

U qoyumo şaryo du cameydan bu parlemento d’Turkiya Tuma Çelik bi rmoyto dımqadmole lu waziro di zarocutho u da cobe Bekir Pakdemirli grışle u zuhoro cala akore dkıtne b’Turcabdin dıklozım micawni.

Çelik bi rmoyto kımşayıl mu wazir mın mcadronutho gıdsoyım la akore, u bebzabno mın fulhono gıdsoyım mqabıl da şıkwat dkito bha di şırke du kahrobo dkıtyo bu qlimo.

U qoyumo du cameydan bi rmoyto kmahke calu kris du kyono wi naşifutho dkowe kmahıt tacno yaquro du momuno cala akore dkıtne bi karxutho d’Merde.

Me gabo hreno u qoyumo gorış u zuhoro cala şıkwat dkothe cali şırke du kahrobo Dicle Elektrik AŞ dkımşadro fatorat celoye, u dıg qutco uu kahrobo dhın ma qıryawotho u ba alfowat d’Akore kıtlın fatorat celoye du kahrobo.

Bi mawdconutho dkobe u qoyumo du cameydan Tuma Çelik komır idicoyo dhın mu snodo dıkmitahwe la Akore u şutoso d’DEDAAŞ kmahıt ido calaye u lı kobelın la akore. Bu şıklano ma qatrani kule kmahwe du snodo dıkmitahwe la akore latyo snodo dıgmote la akore du qlimo d’Turcabdin.

U qoyumo Çelik laşan gorış u zuhoro du waziro Pakdemirli kımşayele a şuwolani: i waziruthathxu mın fulhono ksaymo laşan şıryo a qatre da tagorani dıkloqın bınne , b’Merde kmo akoro kito bi ruşmoyutho di şıltonutho, u km oma akorani qayıthlın snodo ma mcadronwotho dıksaymutu. Bu huthomo ste u qoyumo kımşayıl bi şato dothe da 2022 kmo akore gıdsındutu.