Qoyumo Çelik grışle u zuhoro cala qetre da Mşihoye

U qoyumo du cameydan bu parlamento d’Turkiya Tuma Çelik, kımdawım dı gorış u zuhoro cala qetre dkıtte a Mşihoye bu athro.

 Bi rmoyto dımqadamle lu waziro di gawoyutho, tlıble mene dımfane cala şuwolayde, bhaq du hboso dıkmisım cala rişone di cito Protestanoyto dkıtyo b’Turkiya.

 U qoyumo du gabo Demoqratoyo da Came HDP Tuma Çelik bi rmoyto dımqadamle lu waziro di gawoyutho Suleyman Soylu, tlıble mene dımfane cala şuwole dıkımşayıl mene cala rişone di tawditho Mşihoyto dlatla zedqe bu athro.

Çelik komır; a citotho cal dlatlın ruşmoyutho bu athro, mawxaste kıgurşi casqutho bu myodo dfalohe la citotho xıd kohne, malfone u ğer. Mu fawdano dkito ba qonune, i cito Protestanoyto kıgurşo casqutho u kmıjboro dmamtiyo kohne me larwal du athro. U hatheste kımamtiyo cam ruha, dlıkmitahwelın fsoso yaste lıkmitawrıx ufsoso dkıtlın.

Bi rmoyto u qoyumo Suryoyo komır; lfuth a tebe dmatilan, mu zabno du kewano di Corona, kmitawfıqi a mşale u rişone di cito zıttır me kull zabno. İ sbuthathe dyoşo du zedqe di tawdithoyo metul d’Turkiya kudco dlaybın dmawrıwi rişone bu athro. Wi naqla dımitamte me larwal di barmothoyutho du athroste, kmitawfaqlın qetre du fsoso bu athro.

Bhaq di casqutho uda qetre dıkcayşo i cito Protestanoyto wa citotho hrene, u qoyumo du camaydan b’HDP Tuma Çelik mqadamle rmoyto lu waziro dımfane aclaye lfuth u qonuno dkito bu parlemento du athro.