06/10/2021

Qoyumo Çelik mqadamle rmoyto dışwole lu waziro di mardutho u du turizm

U qoyumo şaryo du camaydan bu parlamento d’Turkiya Tuma Çelik, mqadamle rmoyto dışwole lu waziro di mardutho u du turizm Mehmet Nuri Ersoy u kımahke cala timoyotho marduthoye u makthabzabnoye du camaydan b’Turkiya.

Ba şwolani du qoyumo Suryoyo Çelik lu waziro Turkoyo dkobıc dmifanın b’kthawto, kımşayıl cali ctidutho di cito d’Mor Yuhanun dkıtyo b’Mırde u dıkmibıc dmizabno.

Bu şuroyo di rmoytathe dımqadamle u qoyumo şaryo du camaydan bu parlamento d’Turkiya Tuma Çelik lu waziro di mardutho udu turizm Mehmet Nuri Ersoy komır; Kobacno da şwolaydi dmifanın b’kathawto mu waziro lfuth u mluwo da 98 du nomuso esonoyo du athro uda mluwe da 96 uda 99 da qonune du parlamento.

Çelik mırle; Xıd kıtyo idıci a dukotho di slutho-dukotho tawdithoye mqadşe’ne. U leşan u camo Suryoyo a citotho mqadşe u ulsoye’ne. Camgabe di diloytathe i tawdithoyto, i cito d’Mor Yuhanun dkıtla makthabzabno d’1600 eşne, kıtla timoyutho marduthoyto. Bu taro da prensibe du athro, a mdabrone klozım dımhafdi cala dukotho di slutho da bnaymothoyathe. U hano, ha ma talabe asasi di hirutho di tawditho’yo.

U qoyumo Suryoyo mırle; U mınyono du camo Suryoyo dnaqıs bıgawe u hedor Mırde, lıklozım dmahrıw i ulsoyutho tawdithoyto da citotho. Xıd aydarbo u masığdo d’Selimiye b’Edirne lo belhude kıtle ulsoyutho l’Edirne elo la Maşılmone kulle, a citotho’ste kıtte ulsoyutho la Mşihoye. Calathe kobacno dımşayalno mu waziro;

1.Kibe dmitakle u zebono di citathe?

2.Kiba i waziruthathxu dmaydo tedbire u dımhafdo a citotho?

3.U zebono da citotho-latyo mqabıl du numuso udu lumodo da zedqe noşoye?

4.Kımaşetu fulhone cal tedbire qonunoye bnişo dmımnıc u zebono da dukotho di slutho-xıd mathlo a citotho?

5.Kmo citotho u dayre, a morathe farsufe privat’ne b’Turkiya?