Qoyumo Champion mawdele bu sayfo da 1915

U qoyumo d’Australia mdele i maqırhonutho du snodo di mawdyonutho bu qtolğenso dsim calu camaydan, calan Armınoye u cala Yawnoye mi mamlaxtho da Cuthmanoye ban 1915.

 U qoyumo Australoyo Nick Champion, snıdle i maqırhonutho dcali mawdyonutho bu Sayfo dsımla i mamlaxtho da Cuthmanoye ban 1915.

Li lohitho di mawdyonutho bu Sayfo dsim ban 1915 cala Mşihoye dıkhoyan’wo bi mamlaxtho da Cuthmanoye, mıştawtafle ucdo qoyumo hreno du parlamento d’Australia Nick Champion. An ışmone di lohithathe da qoyume u senatore d’Australia’ste, kull dkothe kıyurxo wu ucdo mati u mınyonathe l’22 senatore, qoyume u wazire du athro.

U qoyumo Nick Champion dkıtyo mnaqewo lu parlamento ba 2016 kısonıd i mawdoyunutho bu qtolğenso dan 1915. Champion dkıtyo mu gabo da Falohe, u mcadrono du mşalo di Sictho da esore baroye, du sutoroo udi tagorutho du parlamento d’Australia’yo. Champion, tlıble di şultonutho uma bnaymothoye du athro, dmıctarfi bu qtolğenso dsim calan Armınoye, Othuroye u Yawnoye u dkolın mqabıl du tenkirano d’Turkiya.

Bu yarho d’Şbot dı şafıcina, mşakalwo İnisyatif mşawtıfo di Kinutho bu parlamento d’Australia leşan u mdoyo d’maqırhonutho dımtaybo’wa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthbe folitiqoye, akademikoye, u falohe du tbocofroso uğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dı britho.