Qoyumo Entsch mawdele bu qtolğenso da 1915

Qoyumo hreno d’Australia mıdhele i maqırhonutho du snodo di mawdyonutho bu qtolğenso dsim calu camaydan, calan Armınoye u cala Yawnoye mi mamlaxtho da Cuthmanoye ban 1915.

 Qoyumo Warren Entsch dkıtyo me Queensland u folho catiqo, ha ma folitiqore rişoye dıksonıd a zedqe da qalilothoyo.

U qoyumo d’Leichhardt d’Australia Warren Entsch, mdele i egartho di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dı britho. Bu mamlayde Entsch mırle; Ulsoyoyo da marcyothaydan kulle dı qudri dı xulqi arcutho du snodo u dsaymi qroyto lu parlamento d’Australia dmawde ba qtolğense dsimi cala tlotho camani.

Cala melaniste, u mşalo du tukoso dan Armınoye b’Australia mqadamle tahınyotho bı ışme du camo Armnoyo, Othuroyo-Suryoyo u Yawnoyo. Bu yarho dı şbot dı şafıcina, mşakalwo İnisyatif mşawtıfo di Kinutho bu parlamento d’Australia leşan u mdoyo d’maqırhonutho dımtaybowa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

13 qoyume mawdelın bu Sayfo dan 1915 u 7 senatore. 25 bu yarho dı şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthıbe folitiqoye, akademikoye, u falohe du tboco froso u ğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dı britho.