Farsufe mu cameydan mraşahe ruhaye la guboye qlimoye b’Almanya

Farsufe mu cameydan mraşahlın ruhaye la guboye dıgdowın bıhdo ma 16 hiğmonwotho du athro d’Almanya dkıtyo Nordrhein-Westfalen.

 A ğuboyani dkıtne qlimoye da Mawtbe da karxwotho, bu zyudo b’Gutersloh u hedora u bı Gronau u hedora, farsufe mu cameydan mraşahlın ruhaye.

 A guboye qlimoye da Mawtbe da karxwotho dıgmisomi 13 bu yarhano d’İlul, gdımbayni hayna man abne du cameydan u Suryoyo-Othuroyo dgıdmaydi duktho ba Mawtbani. Lfuth i mawdconutho dmıdlan me Almanya, amraşhe dkıtne ma abne u bnotho du cameydan bu zoyudo mi mditho d’Gutersloh u hedorane dıkhoye eba mınyono celoyo mu cameydan, u acmaste mi mditho d’Gronau u hedora.

A farsufe dımraşahlın ruhaye, mşarelın ba fulhone du tehwiyo da mawdconwotho u dımcalqi a surothathe ba dukothe dıkhoye ebeye u cameydan, leşan dmaydi qole makıfyone u dı qudri cubri la Mawtbe da karxwotho da mdinothani.

Ba mawdconwotho dkobın amraşhe du cameydan, ktulbi snodo leşan dhowın u qolo du cameydan ba fulhone da karxwotho u dı qudri dhowın mcadrone ba qetre dkıtle u camo. Bu zabnano amraşhe du cameydan, gdımnasın dmaşımci u qolathe lu cameydan u la came hrene, bnişo dı qudri dmaydi duktho ba Mawtbe da karxwotho di hığmonutho Nordrhein-Westfalen d’Almanya.