Qoyumo George Aryo mqadamle rmoyto şuwolo cali dayro d’Ani dan Armınoye cal gıdmisomo mazığdo da maşılmone

ANKARA — İ Sfaryarhayto Suryoyto d’Sabro dıkmıfroso b’Turkiya bu tebo dı frısla athmil bi dafayda du nawlo mawdacla, George Aslan dkıtyo qoyumo Suryoyo bu parlamento d’Turkiya mu gabo di Demoqratoyutho udu tacbo DEM, mqadamle rmoyto dı şwolo lu waziro di mardutho udu turizm d’Turkiya Mehmet Nuri Ersoy cala maqırhonwotho dhiwi bi sbutho, di dayro d’Ani awkith Surp Asdvadzadzin dan Armınoye bıthır mıd mhathıtho gıdmıftoho la socorwotho xıd mazığdo da maşılmone.

İ dayro d’Ani dkıtyo bi mditho d’Kars d’Turkiya, dbınyo bu doro da 10, hdo ma qentrune olsoye bu makthabzabno dan Armınoyeyo, u kmaydo duktho bi lohitho di yurtutho dı britho d’UNESCO. Ba tebe dı frisi bu tboco froso mawdıc, i dayrathe bıthır mıd sim u hethothayda gıdmisomo mazığdo da maşılmone jemıc.

Calathe u qoyumo Suryoyo George Aslan bi rmoyto dı mqadamle mawdacle, b’Turkiya kito ba mowat dayre u citotho makthabzabnoye cal dlıkmiharre shifi aw kıllın qum shofo. Hın mani simi jwemıc. U sistemano dkıtle dacbar d’mo ışne adyawmaste kımdawım.

Qoyumo Aslan bi rmoytayde mathkarleste, i dayro d’Ani lo bılhude lu camo Armınoyo, elo kıtla olsoyutho rabtho hem l’Turkiya u hemste li yurtutho marduthoyto dı britho. Calathe, a citotho wa dayre dkıtne timoyotho mşawtıfe du athro, du makthabzabno udi mardutho, bıthır mıd sim u hethothaththe, klozım dfayşi bi hiyoyuthaththe i tawdithoyto wi marduthoyto.

Bu tarano Aslan a şwolani kımşayıl lu waziro di mardutho udu Turizm d’Turkiya Ersoy, a idicat dkımmi i dayro d’Ani gıdmisomo jemıc şrolone aw lo? U qdomano qay latyo saqıbloyo lu bınyono dğalabe tawdiyotho u mardwotho d’Turkiya? Bu zabno di waziruthaydox hayna citotho u dayre mşahlıfi l’jwemıc?