Qoyumo Paylan mqadamle rmoyto cali sbutho du tecmiro d’bınyono dıkmıbne cala bethqbure da Armnoye b’Ankara

U qoyumo du gabo d’HDP Garo Paylan mqadamle rmoyto lu waziro du mahduro  udu tecmiro da mdinotho cali sbutho du tecmiro d’bınyono dıkmıbne cala bethqbure dan Armnoye b’Ankara.

Me gabo hreno u Komisyon du hukuk da mdinotho udu mahduro, mqadamle şıkwe leşan dmıftıh bethdino bhaq da farsufe dımahrawlın cito Armnoyto wi bethknuşto da Yudoye dkıtne b’Omid.

Bu tebe dhuwolan athmıl mawdacwolan dıkmitacmır bınyono cala bethqbure da Armnoye dkıtne bi şawtho d’Ulus b’Ankara. Bıthır mu tebano u qoyumo du gabo Demoqaratoyo da Came-Garo Paylan mqadamle rmoyto lu waziro du mahduro udu tecmiro da mdinotho, leşan dmitakle u tecmiro du bınyono dcala bethqbure dan Armınoye, Yawnoye u Qatholiqoye.

Bi rmoytathe u qoyumo kımşayıl lu waziro, qay lıkmitakle calu tecmirano di şırke dkıtyo masırto bi şultonutho TOKİ cala bethqbure d’Ulus. Hal u waziro kodıc bu tecmirano, kımahrıwo i şırke u şıkıl di mdito? Aydarbo ktoritu dmitahıt betong cala bethqbure dan Armnoye.

U baro du hukuk du mahduro udu hukuk da mdinotho, mqadamle şıkwe leşan dmıftıh bethdino mqabıl da farsufe dmahrawlın i cito dan Armnoye wi knuşto da Yudoye dkıtne hedor Omid. Bi şıkuwe dımqadım kmitamır dıklozım da bınyonani dkıtne makthabzabnoye, dmimodi tahte du sutoro u bcayni zabno dmihatthi.