Qoyumo Sliwa hule maqırhonutho cala hjome dıkmisım cala dukane du Alkohul bu Iraq

U qoyumo catiqo du camaydan bu parlamento du Iraq Josef Sliwa, mawdacle di Maşılmonutho tuhmonoyto kımdawmo dmafito la haye i tahrazto du tewfiqo du mede dfayış mu camaydan bu athro du Iraq.

Sliwa bi maqırhonutho dhule lu tboco froso kımşayel, qay kmıhjım cala dukane du alkohul, elo i şuqo di tagorutho da gelone mtanwone kmıtroyo hirto?.

 U qoyumo catiqo du camaydan bu parlamento du Iraq Josef Sliwa, bi maqıblonutho dsimo acme bu froshezwo du Iraq, maglele liholo du sxoro da hudre uda dukane du alkohul, falqo mi tarmitho du tewfiqo du camo Kaldoyo Suryoyo Othuroyo dhani ışne kımdawmo mu athrayde du Iraq, u mırle “qay kmisım hjome cala dukane du alkohul?, elo a’gelone mtanwone lıkmimodi li ido. Mawxa ste kito keşlo şek u ha kımşayel, mınyo u nişo da hayle dıksaymi hjome cala dukane du alkohul, u qay i şuqo da gelone mtanwone kmıtroyo hirto?”.

Bebzabno, Sliwa mawdacle du sxoro da hudre uda dukane du alkohul latyo fulhono qonunoyo, uknofıl bu taro di kampanya du nfoqo mqabıl du fako di ciyeşe da Mşihoye, bnişo dımgalwın u mede dfayış mu camaydan mu athro da n’abohothayde.

Sliwa mırle ste “kito ğalabe dukane du alkohul sxiri cıl mıdkıtne ruşmoye, a’dukanani kıtlın ruşmoyutho mi dayira di mşaynutho udu hulmono dkobolın fsoso du fulhono, elo a’hjomani kmisomi cal da fusqone di mşaynutho kbişene ma grube mzayne”.

Andre dkıtyo farsufo mu camaydan du Iraq, meqım kmo şabe tre farsufe dıkqılciwo motor mhalaqwolın foqucwotho cali dukanayde du alkohul. Andre komır “a’grubani kıbci du Mşihoyo haroyo dnofıq udıtore u Iraq. Ahna kmimodina nişo elaye”.