Qoyumo Yusuf Aydin grışle u zuhoro cali aykanoyutho da qalilotho d’Suriya, u mirle; klozım dmitıctarıf ba Mşihoye xıd camo şerşoyo du athro cama zedqe kulle dıkşowe

STOCKHOLM – U gelyunoro di sfaryawmo Swedoyto-Dagen, laqi u qoyumo du camaydan mu gabo da Mşihoye Demoqratoye Yusuf Aydin bu parlamento du athro leşan dımşayıl mene i sbutho di aykanoyutho da Mşihoye d’Suriya’wa wu ğamo rabo dkito adyawma, calu qtolcamo haroyo dsim cala Mşihoye ucala Calawiye dıkhoyın ba mdinotho du sforyamo d’Suriya. Aydin, grışle u zuhoro calu qento du qşoco da Mşihoye mu Madınho Mescoyo u maşbahle u qtolcamo, ba hawbe barbroye dsımwole u tukoso marhıbono d’Dacış meqım 10 eşne.

Ba taxtuşe dhawın bu sforyamo d’Suriya ba yawmotho dşafıcina, qtılwo bşıkıl sistematik hol alfo farsufe-i sagiyoyuthathe Calawiye elo acmaye’ste, mınyono d’Mşihoye dlatwolın htitho bu şwolo. Calathe u qoyumo Yusuf Aydin mırle; Hano gunho rabo’yo d’naqla hreto dkowe cala qalilotho du Madınho Mescoyo. İ aykanoyuthathe kıxulqo ğamo u zuctho rabtho dıkuwyo celtho, du camo naqla hreto dmahzım ma dukothayde. Aydin kımawdıc di sbuthathe ğalabe qarıwto’yo ele, cal du babo qtılwo b’Turkiya  ucal dhuwe’ste Suryoyo’yo-u şwolano d’Suriya kımakıwle u kım’athır acle’ste.

U qoyumo Aydin dmıjğele cali mdabronutho hathto d’Darımsuq mırle; Bi meltho, mawdacla dgımhamyo a qalilotho, elo bu praktik lo sımla hawxa mede wu hathe, kıxulqo qento hreno dxole u qlimano ma Mşihoye. Calu şwolo dımşayıl-u Swed u Urifi mın kibın dsaymi bi sbuthathe, Yusuf Aydin mırle; Bi qamayto, klozım dhowe mawdyonutho ba rdufye uba gunhani dcala Mşihoye. Klozım dmıgrış u zuhoro cali aykanoyutho da Mşihoye ba esore diplomatiqoye dıkmisomi, dmitahıt tedbire momunoye cala hayobe ubebzabno, dmiçazın u dmıtlıb hşowe menaye.

A Mşihoye klozım dhowın bıgawe du maşıqlo du tuyobo da qonune d’Suriya, du nomuso dımbayın dlowe cala qonune di şarica udu rişono du athro dıkmıtlıb dhowe Maşılmono. Klozım dmitıctarıf ba Mşihoye xıd camo şerşoyo du athro cama zedqe kulle dıkşowe. Bu huthomo Yusuf Aydin komır; U rişono Alşarıc meqım masro’we b’al Qacida. Ucdo kıtocın qraweta u kımahwe ruhe bu masırho dbritho-elo u farsufano, klozım bi qamayto dımthabıt ruhe u dımtabıq a şudoyayde-u makthabzabnayde, latyo ğalabe msimono.