Cemil Bayık (KCK) mırle bu froshezwo d’Sterk; A hçome d’Turkiya kowın celtho dlo qudrina d’şorina u gerilla di PKK u dtore mu zaynayde

Cemil Bayık dkıtyo ha ma mşatsone di PKK, sim acme maqıblonutho mu froshezwo d’Sterk cala şuşote haroye dhawın b’Turkiya. U rişono zawgoyo di KCK m’akadle bu mamlayde, cali ulsoyutho du terkiwo d’şartat towe leşan dqudro i PKK dsaymo i kongrayda u dımtabqo i qroyto du rişonathe Abdullah Öcalan bi sbutho du şroyo du gerilla xıd haylo folhoyo.

27 bu yarho d’Şbot frıswole Öcalan egartho mu hbuşyo u sımwole qroyto li PKK dturyo mu zaynayda u dmışroyo bnişo dmitabde u maşıqlo da droşe du şlomo cam Turkiya. Cali qroytathe’ste, sımwola i PKK bu şuroyo du yarhano d’Odor iclan şalyuthzayno. Elo mu zabnawo uholucdo’ste, kımdawmo Turkiya a cuqobayda cali PKK.

Calathe Bayık, kali cala casqotho dıkluqyo ucdo i PKK ma cuqobe d’Turkiya u mawdacle, da cuqobani lo belhude kımaklın i kongrathe wu maşıqlo du şuhlofano elo kımşakli’ste qento rabo. Turkiya’ste athmıl mdacela, dqtila bi şabthathe 26 gerilla di PKK bu garbyo du Cıraq u b’Suriya. Bebzabno Erdoğan’ste m’akadwole dgımdawmi a cuqobani calu gerilla.

Adyawma’ste u waziro du sutoro d’Turkiya Yaşar Guler mzaharle a hayle Kurdoye kulle dkıtne masre bi PKK b’dukotho frişe du Madınho Mescoyo dmaslımi a zaynathe dlo tehito d’şartat. Me gabo hreno Cemil Bayık m’akadle cali ulsoyutho du ittifaq dhawi beyn du rişono d’QASAD Cabde udu rişono d’Darımsuq Alşarıc u mawdacle, dhano şuşoto ulsoyoyo’yo leşan i mşaynutho du qlimo ubebzabno dmithabti a yuthrone da Kurdoye’ste bi xarita folitiqoyto du dactith d’Suriya.