Qtil gelyunoro saqıbloyo du Hizballah

A hayle di mşaynutho d’Lebnon, mqafelen i şlado du gelyunoro u mbahnono Luqman Salim bi radoytayde. U gelyunoro Salim, saqıbloyo du tukoso d’Hizballahwe.

Athmıl b’safrayto mvayacwo u gelyunoro u mbahnono Luqman Salim, bu zabno di socurutho dıgsamwo lu hawrayde bu taymno d’Lebnon. Bıthır mıd i iqarthayde mnasela dmıtyole u dılo mqafela i radoytayde, mşayela ba bethkrihe ubi nuqazto du polis.

Bıthır kmo şoce, mqafelın a hayle di mşaynutho d’Lebnon, i şlado du gelyunoro Salim bi radoytayde bi mdito di Nabatieh wu telefonayde di ido’ste mqafe bi mdito d’Srifa.

U gelyunoro mşamho d’Lebnon dkıtwe Şica, qtil b’hamşo buğre dımhın b’rişe wu farsufo hfito u idico’we bi saqıbloyuthayde lu tukoso Şica d’Hizballah uli siyase dıkmaşe b’Lebnon ubu Madınho Mescoyo.