23/07/2021

Qtil zıd me 10 marhıbone du gayso kaboşo d’Turkiya b’Cafrin

Zıd me 10 marhıbone du gayso kaboşo d’Turkiya, qtili b’şişaltho d’hçome dsimi ma Haylawotho du Huroro d’Cafrin bu garbiyo d’Suriya.

Me gabo hreno, u camo dıkhoye bi fnitho d’İdlıb mahwele u ruğzayde l’Turkiya cal dıkfayşo şlitho mqabıl da hçome dıkmisomi me Rusya umu rejim cali fnitho d’İdlıb.

A haylawotho du huroro d’Cafrin frıslın athmıl buyono cali netiçe du mrodo dıkmahwın mqabıl du gayso kaboşo dı Turkiya uda çatawiyayde bi mditho d’Cafrin uba qıryawotho u fenyotho d’hedora. Bu buyono dıfris kmitagle cala cuqobe dsimi m’16 uhul 19 bu yarhano, kmitawdıc dkıtne myodo du hayf ma fulhone lo noşoye dıksaymolın Turkiya bhaq da bethıqbure da sohde.

16 bu yarhano, u grub di sohudto Avista sımle cuqobo bi qritho d’Cılımdar bi qastra d’Rajo, ubu cuqobano qtil tlotho çatawiye u mçarıh hreno. Ubu siqumo d’18 bu yarhano, a’haylawotho du huroro d’Cafrin sımlın cuqobo bi şawtho da Villat bu qentrun di mditho d’Cafrin, u qadiri dımfarqıci radayto u mçarahlın 2 çatawiye. Ubu siqumo d’19 bu yarho, a’haylawotho du huroro d’Cafrin bu cuqobo dsımlın bi mditho d’Albab mahru tarte radoyotho matcıne zayno di Doşka, qtilın şawco çatawiye u mçarahlın hamşo hrene.

Ubcayni yawmo, sim cuqobo bi qritho d’Kaljıbrin bi fnitho d’Iczaz, u qtil ebe tre çatawiye u çarıh hreno. Ubu şıklano a’haylawotho du huroro d’Cafrin qtilın 12 çatawiye u mçarahlın 9 hrene. Mxasra hreto, u camo dıkhoye ba qıryawotho uba qastrat du turo d’Alzawiye hedor di dmitho d’İdlıb b’Suriya, qayım li rağlo u mahwele u hfuxyayde mqabıl da haylawotho Turkoye dkıtne markıwe b’10 nuqazyotho folhoye bi fnitho d’İdlıb.

Lfuth i mşatasto d’Suriya da zedqe noşoye, a’bnaynoşo du turo d’Alzawiye ba tagılyotho dsımlın, mahwelın u ruğzaththe m’Turkiya dıkfayşo şliatho mqabıl da hçome dıkmisomi aclaye ma haylawotho Rusoye umu rejim d’Suriya. Ba slogane dmazcaqlın uba buyone dıfrıslın, a’mtagılyone mırlın “qay Turkiya dkıtyo athro dıksoyım u garanti di şalyuthzayno d’İdlıb, kfoyış mfarçono cala hçome dıksaymolın Rusya wu rejim”.

17 bu yarhano, u rejim d’Suriya ba hçome dsımwole cali qritho d’Sarje b’İdlıb qtiwole ışto mdinoye. Uba soruhe dımhalqiwole bcayni yawmo cali qastra d’I(h)sım qtiwole arbac neşe u arbıco nacime u mçarahwole ste 16 hrene mdinoye. Athmıl safrayto ste, qtil şawco mdinoye mıhdo iqartho ba soruhe dımhalile u rejim cali qritho d’Eblin bu taymno d’İdlıb.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…