Qufrus hawila qreyto l’Rusya dmakliyo Turkiya

İmdabronutho d’Qufrus da Yawnoye, sımla qroyto l’Rusya dımdaxlo u dmaklıyo a fulhone dıkmaşyo Turkiya qariwo la thumayda leşan dımqafyo nafto u ğaz bu madınho du yamo Mescoyo.

 Bu mamlo dhawile u rişwazire d’Qufrus da Yawnoye bu telefon camu rişono d’Rusya, tlıble me Mosko dmaklıyo u hbosano dıkxulqo Turkiya bu qlimo.

 Bi maqırhonutho dhuwle u malolo di şultonutho d’Qufrus da Yawnoye Kyriakos Kochios mawdacle, du rişqutno Nikos Anastasiades hawile mamlo bu telefon camu baramnayde d’Rusya Vlademir Putin, cali aykanoyutho harayto du madınho du yamo d’Mescoyo.

U malolo d’Qufrus makadle, du rişono Anastasiades tlıble me Putin dımdaxli leşan dmitaqimo i mwatyutho wu hboso dı xlıqla Turkiya bu qlimo, ba fulhone lo qonunoye dıkmaşyo bnişo dımqafyo ğaz kyonoyo. Turkiya mşadarla meqım kımo yawme sfitho da buhone du geoloji la thume du yamo d’Qufrus.

U Yawnanste ksoyım protesto da fulhonani dıkmaşyo Ankara bu yamo beyn Qufrus udi gzırtayda d’Kreta. Lfuth u malolo d’Qufrus, Putin huwle şudoyo dgımdaxıl leşan dmakle u şuşoto du krizano u bebzabno, dmaydiste duktho ba droşe dgımisomi leşan u şroyo du qetrano d’Qufrus.

Mawdıcste du rişono Rusoyo Putin makadle dkımtahqıb i sbuthathe me qariwo u kıtocın ğamo calu krizano elo ksonıd du krizano dmışre bu darbo du dialog dkıtne cali arcutho da prensibe da qonune Emwothoye. Qufrus u Yawnan dkıtne hadome bu Huyodo d’Urifi, krıhlın u qedomo d’Turkiya dıkmdacyo dkıtla zedqo dkurxo cal nafto bu madınho du yamo Mescoyo.