RİŞİZGADO ARMINOYO CIRAQ-SBUTHO QTOLĞENSO

U gunho du qtolğenso du Sayfo da n’Armınoye dsımwo meqım 107 ışne bu zabno di mamlaxtho da cuthmanoye, heş kıtle duktho asasi mbayn da sebwotho dıkmitahwelın yasifutho mu kenşo emwothoyo dkım’akıd ste i ulsoyutho dmitathkıri a’debhe dlatwolın htitho du qtolğenso da na’1915. A’melani du rişızgado d’Armenya ne dkıtyo bu Ciraq Elik Garibyan.

Garibyan bi maqıblonutho dsımla acme i dafo d’Caynkawa du camaydan, m  awdacle da hfitwotho dıkmisomi bıbritho bu duxrono du qtolğenso du Sayfo, kmaglın cali şrorutho dkito dıbritho lıqadiro hul ucdo dıtıcyo u haşo dhawiwo bi şato da na’1915 mqabıl da qalilwotho umthoye Mşihoye dıkhoyanwo b’Turkiya.

U rişızgado d’Armenya Garibyan mırle ste “u tenkiro wu lo myodo du hşowo, kımmathli qetre rişoye b’qamuthıd du mnoco da qtolğense, uhul ucdo a’generasyone dmaxlaslın mu Sayfo da na’1915 kmiqadamlın bilokinutho. Camıhbol a’qtolcame heş kımdawmi bıbritho, xıd mathlo u mede dhawiwo b’Rawanda bi şato da na’1994 wu qtolcamo dhawiwo bhaq da Yezidoye d’Şigur du Ciraq bi şato da 2014. Adyawma bi dacwa du zedqo di hirutho du renyo, khozina dkito fulhone dkımşaçci li bceldboboyutho, li tuhmonoyutho, li frişutho ulu tenkiro da qtolcame.

Camgabıdathe, Garibyan makadle da mimaryotho, a’buyone, a’kthowe dıkmıfrosi wa buhone dıkmisomi, kımcadri lo balhude bu tenhiro da generasyone hathe, elo kımcadri ste dmımnıc dhowe qtolcame hathe bıbritho, dilonoyith da buhone dıkmisomi m’farsufe dkıtlın ğensıwotho u tawdiyotho mşahılfe, kıtlın ha nişo dlımikarrıri a’haşani naqla hreto yo. Bebzabno, a’duxrone dıkmisomi ba yawme şatonoye du Sayfo, kmıhşowi dawse ulsoyto laşan dıkmınco dhowe qtolğense hathe bıbritho.