Rişonitho du qlimo d’Michigan d;Amerika fsıqla dhowe u yarhano d’Nison 2022, u yarho da Kaldoye d’Amerika

İ rişonitho du qlimo d’Michigan d’Amerika Gretchen Whitmer bu şuroyo du fusqonayda dmıdla, mawdacla da Kaldoye Othuroye dkıtne camo Şimoyo udıkmawdıci ste ruhaye bu ışmo d’Suryoye, u camo şerşoyo d’Bethnahrin ne dıkhoyanwo bu madınho mescoyo ba dore catiqe dıbritho ba n’athrawotho dıkmidoci ucdo ba nışmone du Ciraq, Suriya, Turkiya wu İran.

Lfuth whitmer, gawonoyith kito bu athro d’Amerika hedor 500 alfo Kaldoye Othuroye Suryoye, baynothaye 160 alfo khoyın bu qlimo d’Michigan dkıtyo u kunoşo rabo dkulle du camaydan b’Amerika.

Bıthır mathe, Whitmer mawdacla du camo Kaldoyo Othuroyo Suryoyo hawi nişo l’rdufye mtakse bu athro da n’abohothayde, u grışla ste u zuhoro cali rişıdşato umthoyto d’Akitu dkıtyo u cıdcodo du rbico, du mawlodo udi mafıryonutho dıkmisomi i sagiyutho da hfitwothayda kul şato bu siqumo d’Ha bu yarho d’Nison.

Bebzabno, i rişonitho du qlimo d’Michigan grışla u zuhoro calu siqumo d’24 bu yarhano d’Nison dkıtyo u duxrono du Sayfo awkith u qtolğenso dmatımwole a’haye d’malyun d’farsufe ma Kaldoye Othuroye Suryoye u Armınoye u Yawnoye.

Whitmer mırla ste “cal di cito Kaldoyto dkıtyo u şerşayda mi cito d’Madınho kımcadcıdo u cedo da sohdayda kulle bu yarho d’Nison, ukmathkıro a’kohne şarire di cito, a’dayroyotho wa cılmoye. Ucal du camo Kaldoyo Othuroyo Suryoyo kenşoyo dkıtle cyode u mardutho catırto dıkmawthıro u kenşo d’Michigan udkımşawşıtole bu haqlo di amnorutho, di tagorutho, du qonuno, di folitiqoyutho, du yulfono, di osyutho udi ardixlutho, mawxa ste ınno i rişonitho du qlimo d’Michigan Gretchen Whitmer kmawdıcono lfuth u medano dmibayın u yarhano d’Nison di şato da 2022 u yarho da Kaldoye d’Amerika”.