Robel Bahho mawdacle Turkiya mawthronitho rabthoyo cali tahrazto bcelıdboboyto d’Darmsuq

Mşalo mu Gabo du Huyodo Suryoyo d’Suriya d’GHS, mawdacle du rejim dı Turkiya dkımrayşanle Erdoğan, kmıhşu u mawthrono rabo dkulle mi tahrazto bceldboboyto dkıtla Darmsuq ba tarte mdinotho di Hasake u d’Qamışli. 

U hadomo di sictho mdabronitho d’GHS Robel Bahho, bi maqırhonutho dhule lu tboco froso, thımle atre rejime d’Suriya u dı Turkiya dkımnasın dıtıfki i fnitho du garbay madınho d’Suriya laf qrobo hatho.

 Bu hfuxyo dmahwele cali mwatyutho dhawyo ba zabne haroyani ba mdinotho di Hasake ud’Qamışli, u hadomo di sictho mdabronitho du gabo du huyodo Suryoyo d’Suriya d’GHS Robel Bahho, mırle “Darımsuq kmıstacımlo a’noqufayda xıda rişone tawdithoye wa hadome mawthrone du gabo du Bacıth, laşan dmınfıq mqabıl di mdabronutho yothoyto du garbiyo u du madınho d’Suriya”.

Bahho bi maqırhonutho dhule li dafo d’North Press, mawdacle di şultonutho d’Suriya ktıcno i mşalutho di netiçe di propaganda dsımla m’zabno d’yarho, u mdarbıd da teştıcınye cjiqe dıksaymolın ba mdinotho di Hasake ud’Qamışli, klozım dkurxo cal şroyo kamilo lu kriz folitiqoyo d’Suriya.

Camgabıdathe, u folitiqoyo Suryoyo d’GHS maqrahle dı Darımsuq layba dxulqo qrobo da mathhabe bayn da Kurdoye u Caraboye xdu mede dkımtaybole, u mawdacle ste du kyono da n’esore dkito bi fnitho wu şıkıl du qedomo di mdabronutho yothoyto la came mşahılfe du garbay madınho d’Suriya lıkkobın aftho dhowe hawxa qrobo, elo u rejim dektator d’Suriya kmankır a’came wa hiyoywotho ymthoye mgawne du athro.

Bu huthomo di maqırhonuthayde, u hadomo di sictho mdabronitho d’GHS Robel Bahho, sımle qroyto l’Darımsuq dmahwiyo yasifutho la bnaymothoye d’Suriya kulle dıkhoyın b’gawıd di çuğrafya kamılto du athro, ulo balhude hani dkıtne b’gawıd da fenyotho dıkmisım u duyoqo di mşaynuthaththe mu rejim ba mdinotho di Hasake u Qamışli. Bahho sımle ste qroyto l’Darımsuq dfılho laşan dmışre u kriz di ciyeşe qşitho dıkmicoşo ba fenyotho d’Suriya kulle.

Mxasra hreto, u rişono du gabo du dactid d’Suriya İbrahim Alqaftan, mzaharle ma tre rejime d’Suriya udı Turkiya dkımnasın dxılqi fıtne bayn da came mşahılfe du garbiyo udu madınho d’Suriya, u sımle ste qroyto lu camo d’Suriya dmıştace u dawro dıkmıtlıb mene laşan u şroyo du kriz d’Suriya rahuqo mi tahrazto bceldboboyto d’Suriya udı Turkiya.