Rusya kımdawmo dseymo sturyo Turkiya bi sbutho d’İdlib

Bu zabno d’kothe tebe du qatlo da folhe d’Turkiya fris maqırhonutho mu athro d’Rusya b’haq di sbutho d’İdlib dıkmitawmır d’Turkiya lıkmamtiyo i wolitheyda d’İdlıb li duktho.

 Meqım mi itawto du rişqutno d’Turkiya camu rişono d’Rusya Vilademir Putin Rusya mawdacla du ağuno dımqabıl da marıhbone bi fnitho d’İdlib gımdawım hull u qşoco da marıhbone.

Bıthır mu qatlo da folhe Turkoye dı qtılwo mınyono celoyo mawdacwo du rişqutno d’turkiya Recep Tayip Erdoğan tlıbwole dhowe itawyotho bayn ele lu rişono d’Rusya Vilademir Putin. Bıthır kımo yawme mawdıc di itawtathe gıdhuyo 5 bu yarhano d’Odur b’Mosko.

Minaqa du qatlano hul adyoma kothe maqırhonwotho harufe me Rusya, ba maqırhonwothani qulnaqa kmitawmır d’Turkiya klozım mamtiyo i wolitheyda lahaye, wi wolithatheste dıgtılbo Rusya aw dımwafaqe acla dı Turkiya makılyo a marıhboneyo, awkith Rusya kmawdıco d’Turkiya i rişonitho da marıhboneyo, u hathe kımakdole bi maqırhonutho dıfrısla i wazirutho du sutoro d’Rusya dmawdacla da dukotho d’fayişi bu duyoqo d’Turkiya a dukotho du rişono da marıhbone Jolanine wa dukothe dı qtil Bakir Bağdadine, b’maqırhonutho hreto Rusya kımmo, a dukotho dı Turkiya da dukotho d’amrıhbone cayni dukothene xlitene camhdode.

A maqırhonwothani dsimi ucdo meqım mi itawto d’Erdoğan cam Putin krımzi naqa hreto d’Turkiya latla mede ğalabe dmamtiyo me Rusya. Metul dkul maqırhonutho dıksaymo Rusya kmathkıro dı Turkiya lı sımla i wolitheyda dmıtafaqe acla b’İdlib dıklozım makılyo a marıhbone u fılğolın me hdode hayna marıhbonene u hayna mane saqıbloyene.