Rusya madcarla 27 tloye me Suriya

I wazirutho du sutoro d’Rusya, madcarla 26 tloye mu garbay madınho d’Suriya,  lu athro. I sagiyoyutho da tloyani, mqafın ba bethyatme b’Darımsuq.

 Me gabo hreno mawdıc, bu furqoco dhawi qum nuqazto da marhıbone noqufe d’Turkiya b’Tel Abyad, qtil u mjarıh mınyono d’farsufe.

Lfuth i dafo d’Tass, i wazirutho du sutoro d’Rusya qadiro athmıl casriye dmadcıro 26 tloye me Suriya, lu athro. I mşalonitho du Komisyon d’Rusya dcala zedqe da tloye Anna Kuznetsova makadla, da 26 tloyani gıdmitahti 2 şabe bu qaranten. Bıthır gıdmınqoli atloye lu ahılathe dkıtne b’Rusya.

Imşalonitho mawdacla di sagiyoyutho da tloyani, mqafın ba bethyatme u bı hbuşyo b’Darımsuq u bu şıkılano, law fayış ğalabe tloye Rusoye bi arişkoyto d’Suriya. Mawdıcste d’122 tloye hrene kmıntır cal qariwo dmınqoli b’4 tayosyotho me Suriya l’Rusya.

Bi sbutho hreto calu krizano d’Suriya, i Mşatasto da Zedqe Noşoye d’Suriya dıkmcaqbo u qrobo gawoyo du athro me Britania mawdacla, radoyto mfarqıco athmıl casriye b’nuqazto du duyoqo da ğrobe marhıbone dkıtne masre b’Turkiya b’Sluk-Mabrouka qariwo li mdito d’Tel Abyad.

İ Mşatasto m’akadla, da foqucothani dmahti bi radoyto syamto di idowın u bu furqocano, qtil 4 marhıbone sanode d’Turkiya u mınyono hreno mjarhi; beynothaye mdinoye dkıtwın şafoce qum di nuqazto. Holucdoste heş noşo lo mıdle i mşalutho du furqocano cal ruhe.