Sacd Alhariri hule funoyo lu gabo d’Hizballa cali sbutho di sfitho İranoyto

U rişwazire catiqo d’Lebnon Sacd Alhariri hule funoyo lu gabo d’Hizballa dmawdacwole athmıl di sfitho İranoyto qadmoyto dkıtyo matcanto Mazot mşadro lu athro d’Lebnon.

Alhariri mırle “a’sfinotho İranoye du snodo gıdmamtın camruhaye qento u tedbire hathe mqabıl d’Lebnon”. Alhariri mawdacle ste du tehzimo du nafto lu rejim d’Suriya, i celtho du kriz dıkcaşle Lebnonyo bu haqlo du nafto.

U rişwazire catiqo d’Lebnon Sacd Alhariri bi şişaltho da maqırhınwotho dıfrısle bi dafayde du Twiter, mşayele ida du şedoro da sfinotho İranoye dkıtne matcıne Mazot buşra yo la Lebnonoye aw qentoyo cal Lebnon dcose huweste ba qalat gawoye u baroye?. Alhariri grışle ste u zuhoro calu gabo d’Hizballa dkodıc towo du asas du kriz du nafto dıkmicış b’Lebnon, u tehzimayde yo bidactho lu rejim d’Suriya, u mawdacle du towo dkulle dmitaklewo u tehzimo du nafto mdarbıd dmisomi a’Lebnonoye mınna mqabıl du Mazot İranoyo.

Alhariri mırle ste “u gabo d’Hizballa kodıc ste da sfinotho İranoye du nafto gıdmamtın camruhaye qente la Lebnonoye cam tedbire hrene xdu şıkıl da tedbire dmahti cal Venzwella ucal athrawotho hrene. U qedomo la sfinotho İranoye xıd arco Lebnonoyto kımmathıl dyoşo rabo li morutho athronoyto d’Lebnon. I qroytathe d’Hasan Nasralla kmırfodo ste cal dkımqadmo l’Lebnon xıd hiğmonutho İranoyto”. Callathe, Alhariri makadle du gabayde bu haylo dkıtle bu haqlo athronoyo u folitiqoyo, lıgıdhowe çarçav la tarmiyotho dıkhınqi Lebnon bı qrobe mqabıl da Caraboye udıbritho.

Camgabıdathe, Alhariri mawdacle du qedomo haroyo d’Nasralla kmawdıc ftiho la Lebnonoye dhınne xıd gabo lıkıbci dmişatıs şultonutho, uba melani mdawamle “mın şultonutho yo hathe dgımşaryo a’fulhonayda bu qubolo da sfinotho İranoye du Mazot, udmıstoro fotho l’fotho camu kenşo emwothoyo bu zabno dkıtyo Lebnon sniqoyo l’şultonutho dıkmısnodo ma n’ahunone uma hawrone”.