Sacıd Al Hariri hawile ytawto cam Mor Bışara Butrus Al Raci

Bi ytawto dhawile u rişwazire zabnoyo d’Lebnon Sacıd al Hariri camu fatıryarxo di cito Suryoyto Marunoyto Mor Bışara Butrus al Raci, makadle di şultonutho hathto dkobıc dımşatıs, gıdsaymo a reforme kulle dımbayni u gıdbınyo Beyrut me hatho.

 Me gabo hreno u ardixlo Joe Salloum wa hawronayde, bnelın a bote d’22 yaqrotho di şawtho d’Karantina dkıtyo b’Beyrut wu nuqazto la tloye. A yaqrothani fayşiwo dılo bote bıthır mu furqoco qaşyo dhawiwo bu lmino di arişkoyto.

U rişwazire zabnoyo d’Lebnon Sacıd al Hariri makadle athmıl, di şultonutho dkobıc dmarkıw, gıdmafito a reforme dıkluzmi kule la haye leşan dmitawfıq u athro mu kriz du momuno. Al Hariri makadleste du nişayde, latyo dhowe rişwazire u loste belhude dımşakıl şultonutho elo dmakle u kriz momunoyo du athro u dobe Beyrut me hathoyo bıthır mu furqoco dhawiwo bu lminayda 4 bu yarho d’Ob dşafıcina u dı qtılwo ebe hol 200 farsufe wu husronoste kımote la milyare dolar.

İ mawdconuthathe al Hariri hiwole bıthır mu droşo dhawile 45 qatinotho camu fatıryarxo di cito Suryoyto Morunoyto Mor Bışara Butrus al Raci bu makthıbayde b’Bkırki. Al Hariri mırle; Huwli mawdconutho li qadişuthayde cala wazire dımbayanli li şultonutho dkito bıgawa 18 farsufe, yadcthone şarye dkibın dmafiti a reformani la haye reforme dkıtne bu taro du talab dhawila Fransa menayna.

Elo u rişqutno Michel Aoun, saqıbloyoyo li lohitho da wazirani dımbayanle al Hariri. U rişwazire catiqo al Hariri mırleste; Bi sbutho du hethotho d’Beyrut, makadli lu fatıryarxo calu fusqono kamilo dkıtlan leşan u dactith. A Lebnonoye kulle dilonoyith a dıbhe wa yaqrothathe, kıtte zedqo dudci i şrorutho du furqoco u man kıtocın i mşaluthayde. Lgımkasena cal noşo u kull mede gıdmitawfıq li holo bu taro du numoso u da qonune du athro.

Bi sbutho du furqoco dhawi b’Beyrut, u ardixlo u arşitekt Joe Saloum wu ğrobayde bnelın magon 22 bote d’yaqrotho u nuqazto la tloye bi şato faqırto d’Karantina dımathrowa ğalabe mu furqoco dhawiwo bu lmino d’Beyrut. Lfuth Saloum, i şultonutho lkımqadmo mcadronutho makfıyonitho la bnaynoşo dımvayaclın a botathe bu furqocano.