YPG mowdacla dılo sımla hjomo cala hayle di Peşmerge

U rişwazire du qlimo d’Kurdistan Masrour Barzani, krıhle uhjomo dsımlın a Haylawotho du Sutoro du Camo-YPG cala hayle di peşmerge dkıtwın qariwo la thume du garbyo d’Suriya.

 Bi sbuthatheste i mdabronutho gawonoyto da hayle di YPG frısla buyono u rfıdla a idicat dıfrisi, dsımlın a Mharbonayda hjome cala hayle di Peşmerge u mawdacla, dhıne kımyaqri i morutho du qlimo d’Kurdistan bu garbyo du Iraq.

Bi maqırhonutho dhuwle u mcadrono di wazirutho di Peşmerge du qlimo d’Kurdistan la gelyunore, mawdacle d’8 Mharbone di YPG mnaselın yawme dı tlotho dcubri lo qonunoyith lu qlimo d’Kurdistan bu darbo du thumo d’Fişxabur. Wa hayle di peşmergeste lo trelın a Mharbonani dcubri lu qlimo u calathe 3 daciri elo a 5 hrene mdawamlın dımnasın dcubri elo i peşmerge lo trela. Mdaceste bıthır mu şwolano dhawi 60 Mharbone di YPG, hjımlın cala hayle di peşmerge.

Cali maqırhonuthathe di wazirutho di peşmerge, u rişwazire du qlimo Masrour Barzaniste frısle buyono u krıhle uhjomano di YPG u tlıble mu koalisyon Emwothoyo, da zayne dhuwlın la Mharbone di YPG dılo mitıstacmıli bıhjome calu qlimo d’Kurdistan. Elo cala idicataniste, frısla i mdabronutho gawonoyto di YPG buyono u rfıdla i mawdconuthathe.

Bu buyonano i YPG makadla, da haylawothayda ba haye lıkhujmi cali peşmerge u dhınne kımyaqri i morutho du qlimo d’Kurdistan u sımlın qroyto li şultonutho di KDP dturyo ma qedome qaşye u provokativ dıkmaşyo. Bi maqırhonuthathe mawdıc; Ba eşne haroyani kmitahwe tacbo leşan dhowe kordinasyon beyn di Mdabronutho yothoyto u di şultonutho du qlimo d’Kurdistan. Wa fulhonani misomiwo bu taro du ağuno mqabıl da marhıbone d’Dacış u leşan dmiakd u şlomo wi mşaynutho du qlimo kulle u bu şıkılano msafın aşwole dhawınwo.

İ mdabronutho di YPG mırla; A haylawothaydan lo hjımlın cali nuqazto di peşmerge b’Sihela u layto celtho da Mharbonaydan dıksaymi u duyoqo da thume di Gozarto, dhujmi cala hayle du qlimo d’Kurdistan. Nafıq tebe bı dafe du tboco froso dıkruşmi sırto dkito kaws bu qlimano u hano mede dlatyo şroroyo. U mede dhawi yawme dı tlotho, bsirutho du kordinasyon u du mahwo şqolowe beynothayna u da şutose du qlimo. Ahna kıtulbina mi şultonutho d’Kurdistan, dımatrıko u dnufqo ma klayotho qaşye u provokativ u mu retorik dımaşyo mqabıl di Mdabronutho yothoyto. Aşwole wa qetre kulle, kibın dmisafın bu darbo du dialog.