03/02/2023

Senatore Amerikoye simlen qroyto lu rişono Joe Biden bi sbutho du zebono d’tayosyotho d’F-16 l’Turkiya

Ba casrowat d’senatore d’Amerika, mşadarlın egartho lu rişono Joe Biden bi sbutho du zebono d’tayosyotho d’F-16 l’Turkiya. Bi egarthathe a senatore kthuwlın; Amerika lıklozım dımzabno tayosyotho du qrobo d’F-16 l’Turkiya, hol dıkmaklıyo u cboro du Swed lu NATO. Bebzabno i rişathwazire d’Finland wu bar’amnayda du Swed huwlın maqırhonutho lu tbocofroso bi sbutho du maşıqlano du cborathe lu NATO.

03/02/2023

Bu zabno d’Amerika kımtaybo ruha dımzabno tayosyotho du qrobo d’F-16 l’Turkiya, 29 hadome-hem demoqratoye u hemste qutnuthoye du senato du athro, mdelın athmıl egartho dımşadro lu rişonathe Joe Biden ubi egarthathe, a senatore kthuwlın; Amerika lıklozım dımzabno tayosyotho d’F-16 l’Turkiya, hol dıksuxro u tarco du cboro du Swed u d’Finland lu huyodo du NATO.

Lfuth Amerika, u zebono da tayosyothani l’Turkiy gıdhowe’wo xıd teqnico d’Ankara leşan dmitacbıri a 2 athrawotho d’Skandinavia lu NATO. Elo ucdo mşale frişe d’Amerika kımahwın ilo thnihuthathe lu qedomano d’Turkiya u mqabıl du mkono du teqnico-kubci ucdo dımzawrila zıttır u calathe, kthuwlın a 29 senatore i egarthathe l’Biden.

Bi egarthathe’ste kmitawdıc; Ulo mdoyo di muraçacathe du Swed u d’Finland mi şultonutho Turkoyto, kımşakıl qento lu NATO bu zabnano dıkmihalıq dawse makthabzabnoyto. İnaqla d’Turkiya dmıdyo u qyomano, kiba i kongre d’Amerika dımşaryo dorşo u zebono da tayosyothani udlo’ste, lıklozım dmizabanla tayosyotho d’F-16.

İ kongre Amerikoyto kıtla haylo rabo bi sbutho da fusqone du zebono da zaynayda lğer athrawotho. Meqım 2 şabe laqiwo u waziro di baroyutho d’Turkiya Çavuşoğlu u bar’amnayde u Amerikoyo b’Woşington u kaliwo cali ulsoyutho du zewono da tayosyothani-lo lbelhude l’Turkiya, elo l’Amerika ulu NATO’ste. Camathe’ste i rişathwazire d’Finland Sanna Marin laqyo u bar’amnayda u Swedoyo Kristersson wa 2 gabe m’akadlın; du maşıqlano du cborathe lu NATO gıdmdawım ido bido.