04/02/2023

U İnstetut Mesopotamie maydarle duxrono du yawmo şatonoyo du malfono Naum Fayiq

U İnstetut d’Bethnahrin b’Bruksel d’Beljika, mhaydarle u duxrono du yawmo şatonoyo du malfono Naum Fayiq, dıknofıl hamşo bu yarhano d’Şbot. Bu duxronano u İnstetut gıdmawdıc a farsufe dqmırlın ba muroye du kthowo da mimre uda taşcıyotho bu leşono Suryoyo.

BRUKSEL – U duxronano dımhaydrle u İnstetut bi Bethmardutho du camo d’Bethnahrin dkıtyo b’Bruksel gıdmşare bi şoctho da 15.00 bıthır me falge d’yawmo-ramhıl, yawme d’Huşabo 5 bu yarhano d’Şbot, dkıtyo u duxrono du malfono Naum Fayiq.

Bu yawmano camgabe du duxrono du malfono, gıdmisomi’ste a muroye da mimre ud taşcyotho bu leşono Suryoyo dımtayable u İnstetut d’Bethnahrin d’Bruksel. Bıthır ma mamle dıgdowın cali mıcne du yawmano, u dayone du İnstetut gıdobın a qolathe u gıdmnaqın u mimro wi taşcitho tawto da muroyani.

İ gudeydan d’Suroyo tv dgıhudro bu duxronano, gıdfurso i hfitutho hayo calu darbo du facebook d’Suroyotv. U İnstetut d’Bethnahrin d’Bruksel kısoyım qroyto lu camo dhodır bu duxronano du malfono Naum Fayiq u dhowe sohudo da muroyani.