Sim Hago d’Odor b’Swisra

SWISRA – U Huyodo da Neşe d’Bethnahrin dıkmoyıd duktho ba fulhone umthoye, folitiqoye, marduthoye u kenşoye, kımdawım dmathkır u yawmo d’8 Odor, dkıtyo yawmo du mrodo da neşe mqabıl di lo kinutho u dhawi u darbo du furqono da neşe. Athmıl, dkıtwe 11 bu yarhano, mtayable HNB u hagayde bu salon d’Royal Palace bi mdito d’Winterthur d’Swisra.   

Lu hagano dmıştawtafle ba mowat dfarsufe, i mqadmonuthayde simo me Edessa Çelik dımqadamlaste mamlo bi cohnutho du yawmano. Bebzabno u şutoso d’Şlomo cam surotho u hezwone, mahkele cala fulhone dmaşele b’Turkiya u b’Suriya bu zabno da zulzole u gawonoyith a fulhone dıksoyım.  

U hago mşarele b’qatinto d’şetqo cali ruho da Sohde du Mawtbo Umthoyo d’Bethnahrin uda Sohde du camaydan u sim mamle hrene, dımqadım tahınyotho l’HNB bu yawmano. Bıthır ma mamlani, u zamoro mşamho du lalyo Sargon Gawro u Musa Tan wi gudo dacmaye, ba zmirotho umthoye u marduthoye marqade u mafsahle a hadire dmıştawtaflın lu hagano dımdawamle hola şoce du lalyo.  

U hagano d’HNB d’8 Odor, şafıc b’muzoğo basimo ubı kaşirutho. A mtaybone di hfituthathe mqadamlın a tahınyothathe la mıştawtıfone u sanode kulle u m’akade da zuze du lalyano, gıdmitahwın lu şutoso d’Şlomo leşan dımdawım a fulhonayde lu camaydan u sniqoyo.