Sim hfitwotho mşahlıfe bu yowmo du cnufyo dıkmisım cala neşe

Adyawma dkıtyo 25 bu yarho d’Teşrin u haroyo, kmitathkır u yawmo Emwothoyo mqabıl du cnufyo dkowe cali athto bı athrawotho frişe dı britho.

 A hfitwotho dıkmisomi bu yawmanoste, kmitaybi bu kordinasyon du Fond d’Emwotho Mhaydotho leşan u Şuşoto di Athto (UNİFEM). U Hudro da Neşe Suryoye b’Turabdinste mabdele hfitwotho bu nawlo bi cohnutho du yawmano.

Kul şato kmitathkır u siqumano d’25 bu yarho d’Teşrin u haroyo, leşan dmıgrış u zuhoro du kenşo Emwothoyo bnişo dmitakle u cnufyo dıkmisım cali athto. U yawmano mahıtla Emwotho Mhaydotho ışme; U yawmo Emwothoyo mqabıl du cnufyo di Athto.U nişo du yawmano, dmıtlıb ma şultonwotho, ma tukose Emwothoye u ma tukose şarye dı gurşi u zuhoro calu cnufyo dıkmisım cala neşeyo.

Bı athrawotho frişe dı britho, kmitayıb bu yawmano tarmıyotho, kampanyat, buhone, turgome, yulfono, tagliyotho frişe calu cnufyo dıkmisım cala neşe u cala nacimathe wu cnufyano mın tathir kıtore cali athto. A hfitwothaniste kmisomi bu slogan; Mar Lo, lu cnufyo dıkmisım cali athto! leşan dmıtlıb şawyutho wa zedqe da neşe u dmıkle qum du qatlo dba mowat neşe kul şato.

A hfitwotho dıkmisomi bu yawmano, kmitaybi bu kordinasyon du Fond d’Emwotho Mhaydotho leşan u Şuşoto di Athto (UNİFEM). U yawmanoste kdocır u makthabzabnayde l’25 bu yarho d’Teşrin u haroyo dan 1960, bıthır mıd a 3 ahwotho Mirabal qtiliwo bi Qutnutho da Dominikan calu amro du diktatör Rafael Trujillo, bıthır mu ağuno caşino dhuwolın mqabıl dide.

A neşe hfite ba zedqe noşoye, bıdewolın ban 1981 dmathkıri u yawmo du qatlathe u ban 1999, mbayanwo 25 Teşrin u haroyo xıd yawmo Emwothoyo mqabıl du cnufyo di athto mu Mawtbo gawonoyo d’Emwotho Mhaydotho.

U Hudro da Neşe Suryoye b’Turabdin mabdele hfitwotho frişe bu darbo du nawlo bi cohnutho du yawmano, u mahwelın hfuxyo mqabıl du cnufyo dıkmisım cala neşe b’Turkiya u gawonoyith bı britho.