Sim hjomo cal cito qatıqto bu Swed

Mhalıq foqucotho di ido cal hıdo ma citotho catiqe du Swed.

 Bu hçomano dsim cali cito d’Spånga, hiw ışmo husrono li cito elo noşo lo mçarıh.

Sim hçomo b’3 foqucotho d’molotovcocktail cali cito d’Spånga dkıtyo qarıwto l’Tensta u Rinkeby dıkmidoci karxwotho dkowe ğalabe cnufyo ebeye ma Maşılmone tuhmonoye. Bu hçomano dsim, a kawtho du bınyono di cito hzelın husrono elo noşo lo mçarıh.

İ citathe kıducro lu doro da 12 wi cito catıqto d’Stockholm’yo u naqlat’ste mıstacmılo mu camaydan leşan a Qurobe Alohoye. U polis Swedoyo baroyo azze li duktho u sxırle a darbone u mabdele buhone u lfuth u fusqono dmıdle, u hçomano kmifaşıq xıd hawbo du qatlo.

U kohno di cito mırle; Holucdo lathilan tahdid dhçomo, elo u camlano remzo qawyo’yo mqabıl di cito. İ celtho lo kudcina mınyo, elo kibe dhowe nişo d’provokasyon u xloqo d’ruğzo. Ba 2018, mfarqacwo foqucotho qariwo l’cito hreto b’Spånga uba buhone dsimiwo, mqafe’wo a hayobo u mçaze’wo.

Ba 2019, hol 3 alfo citotho u şutose tawdithoye b’Urifi, sımwo hçomo b’şıkılat mşahlıfe aclaye b’athrawotho frişe d’Urifi.