Sim protestowiye mqabıl da msoke da qoyume b’Turkiya bı athrawotho mşahlıfe

Bıthır mu msoko da 3 qoyume du gabo d’HDP u d’CHP, kımdawmi a tagılyotho wa hfuxye mqabıl di şultonutho d’Erdoğan.

 Bu athro du Swed  u bu athro d’Swisra u camo Suryoyo-Othuroyo mahwele awyutho cama mtagılyone dıkmahwın hfuxyo mqabıl di dişutho udi lo kinutho dıksaymo i şultonutho d’Turkiya.

 Bi taglitho dhawyo athmıl qum du parlamento du Swed, u mşalo da esore baroye du Huyodo Suroyo d’Urifi Metin Rhawi, sımle mamlo u krıhle u msoko da qoyume du gabo d’HDP u d’CHP b’Turkiya. Rhawi bu mamleyde mırle; Bıthır menayna u camo dı xalisina mu Sayfo dsımla Turkiya ban 1915, ucdo a Kurdoye kcayşi cayni casqutho bu athro, metul d’Erdoğan kobıc dmacmır athro dkıtyo ma hiyoyutho dkıtne bu renyayde.

Rhawi komır; En u Swed u Urifi dlo maklın u zawcano d’Erdoğan, gıdhowe gunhe mayire dlaybe noşo tocelın. Mawxa kısamno qrayto li şıltonutho d’Steffan Löfven dmahwiyo klayto mqabıl d’Turkiya ulo belhude i şultonutho, a gabe kule dsaymi hboso cali şultonutho u dmaklın u mazlano d’Erdoğan.

Bi taglithathe u mathlono du gabo Semoloyo du Swed Daniel Riazat sımle mamlo u krıhle u qedomo tuxmonoyo di şultonutho d’Ankara mqabıl da qoyume u da farsufe dkıtne demoqratoye. U rişono zawgoyo du Mawtbo Demoqratoyo du kenşo Kurdoyo Rıdvan Altub bu mamlo dsımle maslele u qedomo tuxmonoyo u faşist d’Turkiya la came u dilonoyith la mnaqye du camo.

Bıthır mi taglitho dmıştawtıflela qariwo l’2000 farsufe ma came frişe dıkhoyın b’Turkiya, sim hfitutho hreto bu qentrun d’Zurich d’Swisra u mqadım mamle du hfuxyo mqabıl da hjome dıkmisomi cala qoyume ucala came.

Bu mamlo dsımle u qoyumo du camaydan bu gabo d’HDP Tuma Çelik, mahkele cala hjome dkowın cala came wa hjomani kımdawmi heş mu zabno du Sayfo uhol adyawma b’siyasat u darbone mşahılfe. Çelik bu mamleyde dmaslele u msoko da 3 qoyume du gabeyde udı CHP u mırle, Leşan dmitaklın a hjomani cala came, ulsoyoyo da came dkıtne b’Turkiya dhowın mhayde mqabıl di tuxmonoyutho dkito bu athro.