Sim tadbiqat mşawtıfo me Fransa İtalya u Qufrus

 Fransa, İtalya, Yawnan u Qufrus, mabdelın tadbiqat folhoyo mşawtıfo bu macırbo du yamo d’Qufrus. U tadbiqatano da hayle du yamo dan arbco athrawotho mşarele athmıl, wu ramhıl kmıntır dtoyım.

 U tadbiqatano sim bu taro di methcadronutho dhawyo beyn dan arbco athrawothani calu hboso u cali mwatyutho dıxliqo bu yamo Mescoyo.

U waziro du sutoro du Yawnan Nikos Panagiotopoulos mırle; u nişo du inisyativano dmid, dmahwıyo i masirutho dkito beyn dan 4 athrawotho Urifoye dkıtne hedor u yamo Mescoyo, dımdabri a qonune wi siyase dkito leşan dlowe hboso u mwatyutho bu qlimano.

İ maqırhonuthathe du waziro Yawnoyo simo, bu zabno da hayle du yamo d’Fransa, Yawnan, İtalya u Qufrus mabdelın athmıl tadbiqat folhoyo bu macırbo di gozarto d’Qufrus bu yamo Mescoyo. U tadbiqatanoste, ramhıl kmıntır dkomıl wu nişayde, dan arbco athrawothani dmaqimi u hboso wi mwatyutho dıxliqo bu qlimanoyo.

Meqım mu tadbiqatanoste, a tayostyotho d’Fransa Rafael u F-16 du Yawnan matın li foqudutho b’Qufrus leşan dmaydi duktho ba droşani. Asfinotho du qrobo dan 4 athrawothani mabdelın u tadbiqat, bu zabno d’Turkiya kımhaydıro ruha dsaymo tadbiqat folhoyo d’ruha leşan dmahwiyo u haylayda.

Cali aykanoyutho beyn du Yawnan u d’Turkiya, u rişono Amerikoyo Donald Trump hawile mamle frişe bu telefon camu rişqutno Turkoyo Recep Tayip Erdoğan u camu rişwazire du Yawnan Kyriakos Mitsotakis. Ba droşe dhawın athmıl, kıle cal sebwotho frişe; beynothaye u şwolo dcalu yamo Mescoyo wi morutho dcala mabuce du nafto udu ğaz d’ham Turkiya u hamste u Yawnan kımdacın dıthene. U rişono Amerikoyo sımle qroyto la 2 athrawotho hadome bu NATO, dımnasın bu darbo du dialog d’şorın u krizano.