Sim taglitho mqabıl du msoko di qoyumto b’Turkiya Leyla Guven

A comure di qastra di Dırbesiye bu garbay madınho d’Suriya, bi taglitho dımtayablın b’qaşyutho krıhlın u msoko di qoyumto Turkoyto mu gabo di HDP Leyla Guven, u tlıblın dmitahwela i hiruthayda.

 Me gabo hreno, dawriye folhoyto mşawtafto ma haylawotho Rusoye u Turkoye sımla duyoqo ba qıryawotho di Dırbesiye.

 Ba mowat d’comure di qastra di Dırbesiye bu garbay madınho d’Suriya, mtayablın taglitho mşayanto mqabıl du msoko di qoyumto bu parlamento d’Turkiya Leyla Guven dkıtyo mu gabo Demoqratoyo da Came (HDP). Amtagılyone dımhalaxlın ba darbone rişoye di Dırbesiye, maclelın a surotho d’Leyla Guven, u tcınlın lohiyotho dıkothuw aclaye; U gabo d’AKP u bcelıdbobo di demoqratoyutho’ yo.

Bu mamlo dsim bi taglithathe b’qaşyutho krih u msoko di qoyumto Guven wu tedriyo di hasinuthayda i folitiqoyto awkith i hadomuthayda bu parlamento mu gabo d’AKP. Bu mamlo dsim, griş u zuhoro cal Guven dkıtyo athto dkobo ağuno leşan i hirutho, i şawyutho wi demoqratoyutho, tlibste da neşe kulle dmaqwın u ağunathe leşan i hirutho d’Guven, u dmitarfın a hfite folitiqoye kulle dkıtne ba hbuşye du athro.

Megabo hreno, dawriye mşawtafto ma hayle folhoye d’Rusya udu gayso kaboşo d’Turkiya, sımla duyoqo ba qıryawotho di Dırbesiye. U duyoqano mşarele athmıl safrayto mi qritho d’Şirge dkıtyo belhude 13 kilomıtre rahıqto mu macırbo di Dırbesiye, u kmişaklowa me 4 radoyotho folhoye d’Rusya u 4 d’Turkiya. Atmone radoyotho folhoye şafici me 11 qıryawotho, u bıthır mıd mkamelın u duyoqo an 4 radoyotho du gayso kaboşo d’Turkiya daciri lan arcotho Turkoye wa radoyotho Rusoye daciri li mditho di Qamışli.