I şultonutho du rişwazire Hassan Diab qmırla u tuxlono du parlamento du athro

I şultonutho du rişwazire Hassan Diab, qmırla u tuxlono du parlamento du athro, walaw a mtagliyone sımlın protesto u rfıdlın i mdabronutho hathto.

 Bu quwolo dsim athmıl bu parlamento, maqbılo hem i şultonutho hathto u hemste u plan du texliso du athro mi aykanoyutho umu kriz dıkşofıc ebe.

Bıthır me droşo d’9 şoce umu quwolo dsim athmıl bu parlamento d’Lebnon, u rişonayde Nabih Berri mhanele u rişwazire Hassan Diab wi şultonuthayde bi wolitho hathto dmıdlın. Bu quwolano, ma 84 qoyume dkıtwın hadire, 63 m’ayade i şultonutho hathto dımbayno’wa bu yarho dı şafıcina.

Bu quwolano’ste, 20 qoyume rfıdwolın i şultonutho hathto u qoyumo’ste lo huwole qole bu knuşyano. U gabo d’Hizballah- Zawco Athronoyo Hiro wu Zawco d’Amal dkıtyo masro ebe, kısundi i şultonutho hathto elo u gabo du rişwazire catiqo d’Sacıd al Hariri, u gabo da Haylawotho Lebnonoye u gabo Progressiv Sosyalist mqabıl du rişwazire udi şultonutho hathto’ne.

U rişono du koalisyon da Katayıb bu parlamento d’Lebnon qoyumo Sami Alljmayıl, mawdacle di şultonutho dhiw ela tuxlono mu parlamento, latyo qonunoyto, cal di ytawto du parlamento mşarela dlo baraj awkith dlo mi şawtofutho d’menyono makfıyono d’qoyume, leşan dhowe u tuxlono ruşmoyo.

Be bzabno, Alljmayıl mawdacle da hayle hakome d’Lebnon mıdlın fusqono dımşatsi şultonutho hathto kopia di şultonutho catıqto d’Lebnon, awkith şultonutho dkıtla cayni tahrazto momunoyto di butja dımbaynowola i şultonutho catıqto. İ şultonutho latyo hiya more dı fusqono, mawxa lıkmitahwela tuxlono.

Bu mamlo dsımle hassan Diab dımbayanwo rişwazire bu yarho d’Konun u qamoyo dı şafıcina bıthır mi isticfa d’al Hariri mırle; Bi qadmoyutho da fulhonaydan, gıdkolina calu cedolo ucalu şuşoto du momuno. Ba tagliyotho dıkmdawmi bu athro, ba taxtuşe dhawın athmıl beyn da mtagliyone uda hayle di mşaynutho mçarahwo 350 farsufe wu 28 menaye ba bethkrihe’ne.