Sim u duxrono du qatlo da 14 ışne d’Hrant Dink

Athmıl dkıtwe u yawmo şatonoyo dan 14 eşne du qatlo du gelyunoro Armınoyo Hrant Dinkwe, dıqtılwo ftiho bi şuqo ba şoce d’falge d’yawmo.

 U zawho du duxrono şatonoyo du qatlo d’Dink, mtayıb bu darbo du nawlo mi celtho du virus di Corona wu gabo Demoqratoyo da Came mathkarle u ağono dhuwle u gelyunoro. Bebzabno u qoyumo Garo Paylan’ste mqadamle rmoyto leşan dmisım buqoro bi sbutho du qatlo d’Hrant Dink.

Kull şato bu siqumo d’19 bu yarho d’Konun u haroyo, kmitathkır u rişkothubo di sfaryarmo d’Agos Hrant Dink, dkull naqla goraşwo u zuhoro da mşale Turkoye calu qtolğenso dan 1915, cali ulsoyutho dımqarwi a Turkoye wan Armınoye lhıdode, calu dyoşo da qalilotho ucali lo kinutho dkito bi siyase du gabo d’AKP. İ Sictho di rişonutho du gabo du Demoqratoyo da Came-HDP, mawdacla u iqorayde lu gelyunoro Armonoyo bi cohnutho dan 14 eşne du qatlayde u mırla; Ğalabe towo kudcina, manyo u qatlo d’Dink. U gelyunoro Hrant Dink, qtılwo mi netiçe du qtolcamo sistematik dıkmisım leşan u dyoşo da qalilotho du athro.

Bebzabno u qyomo Armınoyo bu gabo d’HDP Garo Paylan, mqadamle rmoyto lu parlamento d’Turkiya leşan dmitabde buqoro leşan dmişalıt bahro calu qatlo d’Dink. Paylan mawdacle du qatlo d’Dink-hawbo mtakso’we ma yaminoye tuhmonoye u hatta mşale di şultonutho kıtwolın sawco ebe u mırle; U qatlo d’Dink heş bu telolo’yo wu dawro da mşale bu qatlayde lo magle acle wa mşalo bu haqlo di kinutho lo mbayalın maşıqlo rwiho u mawthrono bi sbuthathe. Paylan sımle’ste qroyto lu bethdinıo da zedqe noşoye d’Urifi dmaydi i dacwathe li ido.

Oğun Samast dkıtwe 17 eşne mawdewole dhuwe qtiwole Hrant Dink u hkımwo l’23 eşne hbuşyo ba 2011. İ dacwathe dbıthır yariwo u dhawyo skandal b’Turkiya, magle da hayle di mşaynutho kıtwolın haj mu plan du qatlo d’Dink elo naqla hreto lo sımwolın mede leşan dmaklalle. Dink, qtılwo 19 bu yarho d’Konun u haroyo da 2007 bi mdito d’Stanbul bfalge di şuqo u bi şoctho da 12 di imomo. Bu zabno du qatlayde’ste, Dink folahwo leşan dan Armınoye uda Turkoye dımqarwi lhıdode u nafıqwo lu bethdino cal d’thımwo d’dışwole u mluwo da 301-dkıtyo u kod di Turkoyutho.

Me gabo hreno u grub du sohdo Nubar Ozanyan dan Armınoye, bi hfitutho dsımle b’Tel Tamır d’Suriya mathkarle an 14 eşne du qatlo du gelyunoro Hrant Dink. Li hfituthathe mıştawtafle menyono d’mathlone mu Mawtbo Folhoyo Suryoyo, mu Mawtbo mdinoyo d’Tel Tamır uba casrowat d’yaqrotho Armınoye.

İ hfituthathe dımşarela b’zawho folhoyo, mdawamla bıthır camu mamlo dsim mu Mharbono Armınoyo Manuel Demir d’mırle; U ağunisto Hrant Dink kull naqla kımnasewo dmawfaqwo li holo i şrorutho du qtolğenso dan Armınoye wa gunhe dsımla Turkiya bhaq dıththe. Dink kmıtyaqanwo dgıdothe u yawmo dıgmisım acle swikast, elo kıtwole haymonutho du ağunano lıgtoyım bu mawtayde.