17/08/2025

Sim u qudoşo di tarte citotho di cito Suryoyto Ortodoxoyto bi golutho

Athmıl dkıtwe 16 bu yarhano d’Ob, sim u qudoşo di cito d’Yuldath Aloho Meryem dımacımro bu tacbo da hadome di cito. U qudoṣano sim bi riṣonutho di qadiṣutho du fatiryarxo di cito Suryoyto Orthodoksoyto Mor İǧnatiyos Afrem II. Bebzabno, sımwo athmıl qudoşo d’cito hreto du camaydan-u hanaqla b’Almanya. Bi mdito d’Dietzenbach, sim athmıl u qudoşo di cito dzwınole u camaydan ma Almanoye.  

17/08/2025

SWED/ALMANYA — Athmıl mrayşanle i qadişutho du fatıryarxo di cito Suryoyto Orthodoksoyto Mor İğnatiyos Afrem II u zawho ruhonoyo du qudoşo di cito d’Yuldath Aloho Meryem bi mdito d’Eskilstuna du Swed. İ rocithathe ihidoyto’yo li cito Suryoyto bi mdito d’Eskilstuna u kıtla hol 600 hadome wi kefo qamayto du bnoyo di cito mahtowa ba 2018. Lu zawhano hadiri’ste a 2 hsayo da 2 marcıyotho du Swed Mor Diyosqoros Benyamen Ataş u Mor Yuhanon Lahdo wu notarrozo fatıryarxoyo-Mor Augin Alkhoury Necmat cama kohne u şamoşe di cito.

Mawdıc di cito hathto gıdmaşyo bıthır mucdo, fulhone mşahlıfe la nacime uli claymutho u gawonoyith lu camo. Bi harayto du zawhano maczımi kulle l’muklo u ştoyo. U zawho fris’ste hayo ma 2 froshezwe du cameydan-Suroyotv u Suryoyo-sat calu darbo du facebook.

Me gabo hreno athmıl, sim u qudoşo d’cito hreto du camaydan. İ çamaca di mdito d’Rotgaw dkıtyo qarıwto l’Frankfurt d’Almanya zwınla i citathe da Qatholiqoye di mdito d’Dietzenbach, leşan dımsalın eba.

İ citathe dkıtyo 29 eşne, mahıtwolın a Maşılmone cayno acla dsaymila masığdo elo bi harayto i cito Qatholiqoyto fsıqla, dımzabnola li cito Suryoyto Orthodoksoyto. U athmıl sim u qudoşo di citathe dmahıt ışma d’Yuldath Aloho. Lfuth i mawdconutho dmatilan mu rişono du mawtbo di cito Bilant Dursun umu matibono d’Mzizah News Gabro Kılıç, u zawhano hani 3 yawme kımdawım b’hfitwotho tawdithoye frişe.

U qudoşo di cito mrayşın ma hsayo-Mor Filiksinos Mattias Nayış, Mor Poliqarbus Augin Aydin wi mcalyutho d’Mor Juliyos Hanna Aydin, u kohno di cito Abuna qaşişo Yuhanun Maksso u acme 2 Xuroye u 10 kohne hrene dhahdiri me dukotho frişe. Bebzabno hadır u rişono di karxutho d’Dietzenbach u mathlone ma citotho Qatholiqoyotho u evangeloyotho cam mınyono celoyo dcamo czimo.

Mawdıc adyawma’ste dkıtwe u yawmo haroyo da zawhani, a 3 hsayo masrahlın 4 afıdyaqne, 11 şamoşe u 10 şamışyotho li cito hathtathe d’Yuldath Aloho dkıtla 2 salone rabe, mınyono d’qeloyotho, dırto u park da radoyotho. U rişono du mawtbo Dursun, mqadamle tahınyotho lu froshezwo d’Suroyotv u l’Mzizah News dkıtwın hadire beynothaye ubebzabno, mqadım mcadronutho zuzonoyto lu froshezwo. Ahnaste cal ışme di mdabronutho d’Suroyotv, kımhanena a mawtbe da 2 citothani u kıtulbinalın kuşore lebonoye bi teşmıştathe uba fulhonathe.