Simi sturyo ahçome dıksaymolın Turkiya u dkobın husrono rabo la qıryawotho du camaydan bu garbiyo du Iraq

A’qoyume du koalisyon di hdoyutho umthoyto du camaydan bu parlamento du qlimo d’Kurdistan du Iraq, sımlın sturyo a’hçome dıksaymolın Turkiya udkobın husrono rabo la qıryawotho du camaydan bu garbiyo du Iraq.

 U sturyano athi luhwoyo bi ytawto dhawile u koalisyon di hdoyutho umthoyto du camaydan camu rişızgado Turkoyo bu Iraq Cali Rida Konay.

 29 bu yarho dı Tamız dşaficina, u rişızgado dı Turkiya bı Boğdod Cali Konay mıstaqbele taşdarto mu grub du koalisyon di hdoyutho umthoyto du camaydan bu parlamento du qlimo d’Kurdistan du Iraq. İ taşdarto dımrayşınole u notarrozo gawonoyo du gabo d’ Bethnahrin Demoqratoyo qoyumo Romio Hakkari dkıtyo bebzabno u rişono du koalisyon, kmişaklowa mu qoyumo du koalisyon d’Alrafidayn Farid Yacqub Eliya wu qoyumo du koalisyon di hdoyutho umthoyto Jinan Jabbar Boya. Li ytawtathe, mıştawtafle ste u izgado gawonoyo dı Turkiya bu qlimo d’Kurdistan Hakan Karajay.

A’tre gabe bi ytawtathe drışlın i aykanoyutho folitiqoyto, wa şuşote msarıhbe dkowın bu Iraq ubu qlimo bu haqlo folitiqoyo.

M’gabo hreno, Hakkari bu mamlo dsımle mahkele cali aykanoyutho du camaydan bu qlimo d’Kurdistan ubu Iraq, wi dhılmiye dhawyo acle ba qıryawothayde dıknıfli qariwo ma thume dı Turkiya bi netiçe da qrobe dkımdawmi bayn dı Turkiya wa mharbone di PKK. Hakkari, mawdacle ste du camo Kaldoyo Suryoyo Othuroyo camo mşaynoyo u latle haso ukloqe qetre mşahılfe, mawxa Turkiya klozım b’şıkıl şnizo dnıfqo moro lu camaydan lfuth a’şartat dıkmicoşi bu maşıqlano ducdo, udlımitacjız ba qıryawothayde dıkhoye ebaye bu garbiyo du Iraq laşan dlımgalwın mu cafrayde.