A haylawotho d’Qasad mtayabe uknuşyo şatonoyathe

Adyawma mtayıb u knuşyo şatonoyo da Mawtbe Folhoye da Haylawotho d’Suriya Demoqratoyto-QASAD.

Beyn da mıştawtfone dlu knuşyano, kito mşale u mathlone du Mawtbo Folhoyo Suryoyo-MFS cam taşdarto mu koalisyon Emwothoyo dkobe ağono mqabıl Dacış.

Bu nişo; A Haylawotho d’Suriya Demoqratoyto u garanti da yuthrone du qawmo udu huroro da fenyotho kbişe udu sutorathe’yo”, mtayıb adyawma u knuşyo şatonoyo da Mawtbe Folhoye d’QASAD bi mıştawtfonutho da rişone da Haylawotho d’Suriya Demoqratoyto uda rişone da Mawtbe Folhoye ba fenyotho du garbiyo udu madınho d’Suriya, beynothaye u Mawtbo Folhoyo Suryoyo MFS.

Camgabıdathe, lu knuşyano mıştawtafle taşdarto mu koalisyon Emwothoyo dkobe ağono mqabıl Dacış, taşdarto mu Mawtbo d’Suriya Demoqratoyto, taşdarto mu gabo du Dactid d’Suriya, mşale ma gabe folitiqoye du garbiyo udu madınho d’Suriya beynothaye u gabo du Huyodo Suryoyo-GHS, cam rişone d’caşıryotho Caraboye wu hayle du sutoro yothoyo.

Bu knuşyano, u rişono gawonoyo d’QASAD Madhlum Cabde sımle mamlo bışme  di mdabronutho gawonoyto, u rişono du haylo da woliyotho mşawtfe general Paul t. Calvert sımle mamlo bışme du koalisyon Emwothoyo, I rişonitho zawgoyto du MSD Amina Cumer sımla mamlo bışme du MSD u Cabıd Hamıd Almihbaş sımle mamlo bışme di Mdabronutho yothoyto du garbiyo udu madınho d’Suriya.

Ba ytawyotho du knuşyo, a mıştawtfone sımlın u nuholo da şuşote folhoye dhawın bi şato dşaficina u drışlınste u nomuso gawoyo da hayle d’QASAD. Bu huthomo du knuşyano, kmıntır’ste dmimıd fusqone u dmibayın tahrazto hathto la hayle  d’QASAD leşan u maşıqlo dothe.