SUDEF ksoyım qroyto dmınfıq moro la haye u la mulkone da Suryoye

U Federasyon da Hudre Suryoye b’Turkiya SUDEF frısle maqırhonutho dıksoyım qroyto dmitawfıqi a qatole d’Gawriye Sarı.

SUDEF dımşalatle bahro calu qatlo d’Gawriye Sarı m’akadleste dıklozım dmınfıq moro la haye ula mulkone da Suryoye.

U Federasyon da Hudre Suryoye d’Turkiya SUDEF bi maqırhonutho dfırsole bı kthawto sımle qroyto da qatole d’Gawriye Sarı dmımsoki u tlıble rişo basimo li eqartho dıb’Sarı.

SUDEF bi maqırhonuthayde mırle, ”lfuth di mawdıconutho dhiwo ma sohude di qritho bıthır mıd a qatole dazın lu bayto d’Gewriye Sarı b’şuctho ba 10 dıblalyo athi qolo du zayno. Elo bıthır bi şuctho da 6 safrayto a comure di qritho azın lubaytayde u hzelın Gewriye Sarı mitho, calathe hulın xabro la haylawotho di mşaynutho. U medano kxolıq u keşlo dmitazıd qatlo hreno cala qatle dlatne a hayobaththe idice”

Bi maqırhonutho SUDEF kmathkır, cal dlo mqafın a hayobe da qatle da Suryoye u camaydan fayış jbiroyo dımgalwe. U Federasyon da Hudre Suryoye mawdacle ba 1990’yat holl adyawma a Suryoye hawın nişo lı grube kontra uba casrowat dı bnaynoşo qtili u sımle qroyto lu ray dı britho ”klozım dmisım harake b’mahisutho u hasasiye mqabıl da hjome dkowın calu camo Suryoyo”. U m’akadle u medano wolitho di noşoytoyo.

Me gabo hreno bi maqırhonutho mamte lu boloste ba tarte ışne haroyani htifi Şmuni u Hurmuz Diril u qtil Yusuf Kurt bu turo d’İzlo. U medano kmamte lu bolo a qatle sistematik dsimi cala Suryoye ba zabne dmeqım. Bcayni zabno tlib ma mşale di dawle, a qatole d’Gawriye Sarı dmitawfıqi li holo u dmihaşwi, wi mşaynutho da haye uda mulkone da suryoye dmihaqıq. U federasyon da hudre Suryoye i qroytathe hawile la şuşote u tukose camaydan ”dmaclın qolayye mqabıl da teştıcınye cjiqe dkowın calu qlimo du turo d’İzlo. U bkul haqlo dmamtın li duktho a woltho dıknofıl aclayye.”

Bi harayto di maqırhonutho b’qaşyutho krıhle SUDEF a hjome dkowın calu camaydan. 8 bu yarhano d’Ob bi qritho d’Badıbe d’Turabdin lafi şuctho da 10 dıblalyo Gevriye Sarı dkıtyo ha ma abne du camaydan qtil me farsufe di hiyoyuthaththe latyo idıcto.Lfuth di netije du taşroro du otopsi Gewriye Sarı qtil bı tlotho buğre du zayno. Athmıl sim u cufoyo du mnoho bi cito d’Yıldah Aloho d’Badıbbe. Bi mıştawtıfonutho dbmınyono celoyo dıbnaynoşo mcafe.