Suriya mnıcla u mazlo u mathyeyda laşan dlomibarbız u kewo di Corona

U rejim du rişathro d’Suriya Başar al Asad, mnıcle u mazlo u mathyo du camo beyn da mdinotho, xıd tedbir mqabıl du virus di Corona dmibarbız zıttır bu athro.

 İ mawdconuthathe di wazirutho di gawoyutho d’Suriya, friso bu froshezwo du athro Axbariya TV.

 Bi mawdconutho difrısla athmıl casriye i wazirutho di gawoyutho d’Suriya bu froshezwo di şultonutho İxbariya TV m’akadla, dmnıclın arahlat wu mazlo u mathyo da bnaymothoye beyn da mdinotho u hiğmonwotho frişe du athro.

 Lfuth u rejim d’Suriya, kıtte belhude 5 dacwat du virus d’Corona, elo a şutose di mcadronutho noşoyto kıtucni ğamo, du virusano kibe dhowe celtho lu mawto dban alfayo dıbnaynoşo, cal du qrobo gawoyo bu athro hawi celtho dhorıw u sistem du hulmono b’Suriya.

 U rejim mawdacle du mnoco du mazlo u mathyo gdımşare ramhıl yawme d’Huşabo. Bu şuroyo di şabathatheste mahıtwo mnoco du nfoqo beyn da 6 d’safrayto uda 6 d’casriye u mahıtwo mnoco du fyoro da tayosyotho u huwo amro dmısxori a şırak du athro.

 A şutose u tukose noşoye mawdacwolınste u ğamathe, calu qento dkito dmibarbız u virusano bu garbay madınho d’Suriya dkibe ba mo alfayo d’galwoye ba maşıryotho dmarkıwi u dlayt ebeye mkone lbethkrihe u qentrune du hulmono.